Санъати рақс худ як асари бадеӣ аст. Ҳар як ҳаракати дасту по, мазмуну мундариҷа дорад. Раққоса тавассути он маънои сурудро ифода мекунад. Тӯли даҳ сол аст, ки дар назди Муассисаи давлатии Кохи фарҳанги ба номи Абӯабдуллоҳ Рӯдакӣ, Ансамбли рақсии “Гулноз” фаъолияти худро давом медиҳад.
Ансамбли мазкур соли 2008 таъсис ёфта буд ва сарварии онро Хунарманди шоистаи Тоҷикистон Гуландом Аюбҷонова ба зимма дошт ва ҳозир бошад, роҳбари ансамбли мазкур Аълочии фарҳанги Ҷумҳурии Тоҷикистон Мадина Амонова аст. Ба муносибати 10-солагии ансамбли “Гулноз” дар Кохи Рӯдаки як чорабинии бошукӯҳу идона баргузор гардид.
10-солагии Ансамбли рақсии “Гулноз” воқеаи бузурги фарҳангӣ на танҳо дар вилоят, балки дар сатҳи ҷумҳурӣ унвон карда шуд. Зеро, ҳайати эҷодии ансамбли мазкур дар саҳнаҳои ҷумҳурӣ ва берун аз он баромад намуда, дар дили ҳазорҳо нафар мухлисони санъати рақс ҷой гирифтаанд. Барои кӯшиши бисёру дастовардҳои арзанда ба роҳбари ансамбл ва ҳайати эҷодии “Гулноз” тӯҳфаҳои пурқиммати Мақомоти иҷроияи ҳокимияти давлатии вилояти Суғд тақдим карда шуданд. Таҳти роҳбарии Аълочии фарҳанги Ҷумҳурии Тоҷикистон Мадина Амонова дар ин ансамбл зиёда аз 45 нафар фаъолият дошта, то ба имрӯз бештар аз 200 намуди рақс аз қабили рақсҳои тоҷикӣ, русӣ, ҳиндӣ, арабӣ, эронӣ, озарӣ ва ғайра ба саҳна гузошта шудаанд.
Иҷрои ин рақсҳо миёни кишварҳо дӯстиву рафоқатро боз ҳам мустаҳкам менамояд. Маълум аст, ки дастаи рақсии “Гулноз” хеле ҷавон буда, дар олами печутоби рақс қадамҳои устувор мегузорад. Фаъолияти 10 солаи он бо дастовардҳои назаррас истиқбол гирифта шуд. Иштироки ҳайати эҷодии “Гулноз” дар чорабиниҳои муҳими фарҳангию барномаҳои консертӣ гувоҳ медиҳад, ки Мақомоти иҷроияи ҳокимияти давлатии вилояти Суғд барои муҳайё намудани шароити мусоиди корӣ ба ҳунармандон таваҷҷӯҳи хоса зоҳир намудааст.
Аз ҳисоби ҷавонону наврасони соҳибқавӣ ҳайати ҳунарии ансамбл мукаммал гардонида шуда, барои боло бурдани ҳунари рақси дар вилоят тадбирҳои муассир амалӣ мегардад. Ҳунари рақс дар қатори дигар ҳунарҳо дар ҳаёти ҷомеа мақоми хоса дорад ва олами рақс — олами зебоӣ дониста мешавад. Аз ҷараёни баргузории ин чорабинӣ маълум шуд, ки ансамбли рақсии “Гулноз” бо ҳисси баланди масъулиятшиносӣ ба ҷашни 10-солагиаш омодагии ҳамаҷониба гирифта, барномаи ҷолиби фарҳангиро пешкаши мухлисонаш кардааст.
Медиапортали “Тироз”
Нет комментариев