Имрӯз, 1-уми марти соли 2018 бо иштироки роҳбарони вилоятҳои Суғди Ҷумҳурии Тоҷикистон ва Самарқанди Ҷумҳурии Ӯзбекистон гузаргоҳи сарҳадии «Саразм-Ҷартеппа», воқеъ дар Ҷамоати деҳоти Саразми шаҳри Панҷакент расман боз шуд.
Дар маросими кушодашавии гузаргоҳи сарҳадии «Саразм-Ҷартеппа», ки бо ҳузури фаъолони вилоятҳои ҳаммарзи Суғду Самарқанд сурат гирифт, иҷрокунандаи вазифаи Раиси вилояти Суғди Ҷумҳурии Тоҷикистон Раҷаббой Аҳмадзода ва ҳокими вилояти Самарқанди Ҷумҳурии Ӯзбекистон Туробҷон Ҷӯраев иштирок ва суханронӣ намуданд.
Иҷрокунандаи вазифаи Раиси вилояти Суғд Раҷаббой Аҳмадзода зимни суханронии худ боз шудани гузаргоҳи сарҳадии «Саразм-Ҷартеппа» ва дигар гузаргоҳҳои байни сарҳади давлатии Тоҷикистон ва Ӯзбекистонро иқдоми муҳими роҳбарияти ду кишвари ба ҳам дӯст арзёбӣ кард, ки ба рушду такомули минбаъдаи ҳамкориҳои иқтисодиву тиҷоратии самарабахши дуҷониба ва густариши робитаву муносибатҳои дӯстиву ҳамсоягӣ мусоидат хоҳанд кард.
Зикр карда шуд, ки роҳбарони ду давлат — Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев баҳри азнавбарқароркунӣ, рушду тақвиятбахшии робитаҳои бисёрсоҳа ва ҳамкориҳои мутақобилаи судманд, ки ба дурнамои минбаъдаи ҳамкориҳои дуҷониба равона карда шудааст, аз тамоми имкониятҳо истифода мебаранд.
Раҷаббой Аҳмадзода таъкид намуд, ки ҳамкориҳои минбаъдаи босамараи байни Тоҷикистону Ӯзбекистон, ки дар ин роҳ имрӯз қадами муҳим гузошта шуд, ба манфиатҳои решавии мардуми ду халқ, ки робитаҳои бисёрасраи анъанавии дӯстиву ҳамсоягӣ, ҳурмату эҳтироми ҳамдигарӣ онҳоро ба ҳам мепайвандад ва дар саргаҳи ин дӯстӣ мутафаккирони бузурги Шарқ Мавлоно Абдураҳмони Ҷомӣ ва Алишер Навоӣ меистанд, мусоидат мекунад.
Иҷрокунандаи вазифаи Раиси вилояти Суғд Раҷаббой Аҳмадзода бо ёдоварӣ аз ифтитоҳи хатти ҳавоии Душанбе-Тошканд, баргузории Рӯзҳои фарҳанги Ҷумҳурии Тоҷикистон дар Ҷумҳурии Ӯзбекистон ва Рӯзҳои фарҳанги Ҷумҳурии Ӯзбекистон дар Ҷумҳурии Тоҷикистон, намоиши маҳсулоти муассисаҳои саноатии Тоҷикистон дар Ӯзбекистон ва Форуми соҳибкорон ва тоҷирони ҳар ду давлат изҳор дошт, ки марҳилаи нави ҳамкориҳо миёни давлатҳо фаро расидааст.
Ҳокими вилояти Самарқанди Ҷумҳурии Ӯзбекистон Туробҷон Ҷӯраев низ аз боз гардидани гузаргоҳи сарҳадии «Саразм-Ҷартеппа» истиқбол карда, изҳори боварӣ намуд, ки бо боз шудани ин гузаргоҳи сарҳадӣ ҳамкориҳои ҷумҳуриҳои ҳамсоя — Тоҷикистону Ӯзбекистон рушд меёбанд.
Хотирнишон бояд кард, ки худи ҳамин рӯз ҳамзамон бо иштироки намояндагони Мақомоти иҷроияи ҳокимияти давлатии вилояти Суғд ва намояндагони навоҳии ҳаммарзи Ӯзбекистон гузаргоҳҳои сарҳадии ”Уротеппа-Кушкент”, “Зафаробод-Хавостобод”, “Хавотоғ-Учтурғон”, “Ҳаштияк — Бекобод” ва “Навбунёд-Поп” расман боз гардиданд.
Манбаъ: Сомонаи расмии Хадамоти матбуоти Раиси вилояти Суғд
Нет комментариев