Субҳи санаи 26-уми май дар Ансамбли «Лаби ҳавз»-и шаҳри Бухорои бостонии Ҷумҳурии бародарии Ӯзбекистон Фестивали анъанавии 16-уми «Абрешим ва зираворӣ» ба кори худ шурӯъ кард. Дар он дар қатори бештар аз 300 нафар ҳунармандони вилоятҳои мухталифи Ӯзбекистон, намояндагони ҷумҳуриҳои хориҷа, бахусус Тоҷикистон, Афғонистон, Эрон, Қазоқистон, Қирғизистон, Туркия ва ғайра иштирок намуданд.
Ҷумҳурии мо — Тоҷикистонро дар ин фестивал 28 нафар аъзои Фонди байналмилалии ҳунарҳои мардумии «Ҳафт Пайкар» таҳти роҳбарии Сардори фонди мазкур, Раиси Ассотсиатсияи ҳунармандони Осиёи Марказӣ Мукаррама Қаюмова намояндагӣ мекунанд.
Ҳадаф аз баргузории Фестивали «Абрешим ва зираворӣ», ки имсол маротибаи 16-ум гузаронида мешавад, арҷ гузоштан ба ҳунари волои ҳунармандон бахусус онҳое, ки бо ҳунари дастӣ машғуланд ва бо истифода аз матои аз ҷиҳати экологӣ тозаи абрешим маҳсулот истеҳсол мекунанд, ба шумор меравад.
Ин аст, ки фестивал тавонист ҳунармандони зиёдро бо ҳунари атласу адрасбофӣ, қолинбофӣ, заргарӣ, зардузӣ, кандакориву кулолгарӣ ба ҳам оварад.
Дар қатори сокинони маҳаллӣ даҳҳо намояндагон аз кишварҳои дигар, яъне хориҷиёни дуру наздик аз ин намоишгоҳи бузурги ҳунару ҳунармандӣ дидан карданд.
Ҳамин тавр, ярмарка-фурӯши маҳсулоти абрешимини ҳунармандони дохил ва хориҷи Ӯзбекистон, маҳсулоти ҳунари дастӣ ва фурӯши зираворӣ то бегоҳ идома хоҳад ёфт.
Ба таври муфассал доир ба рафти Фестивали «Абрешим ва зираворӣ» аз маводи минбаъдаи мо ошноӣ пайдо хоҳед кард.
Пас моро дар ин намоиш-фурӯши азими ҳунармандони дастие, ки давоми се рӯз (26-28 май) дар шаҳри қадимаву музайяни Бухоро идома меёбад, ҳамроҳӣ намоед.
Нет комментариев