Тибқи талаботи моддаи 43 Конститутсияи Ҷумҳурии Тоҷикистон «Ҳифзи Ватан, ҳимояи манфиати давлат, таҳкими истиқлолият, амният ва иқтидори мудофиавии он вазифаи муқаддаси ҳар шаҳрванд аст». Меъёри мазкур ба шаҳрвандони Ҷумҳурии Тоҷикистон дахл дошта, ин рисолатро сарбаландона ва бо ҳисси ватандӯстӣ адо карда, дар ҳимояи марзу буми мамлакат аз мудохилаи дохилию берунӣ саҳми назаррас гузоштан мояи ифтихори ҳар фарди ватандӯст маҳсуб мешавад.
Тавре қаблан хабар додем, 1 марти соли равон Фармони Президенти Ҷумҳурии Тоҷикистон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1996-2005 Ҷумҳурии Тоҷикистон ба хизмати ҳарбӣ» ба имзо расид, ки аллакай дар робита ба он омодагиҳо ҷараён доранд.
Мувофиқи Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» ҳамасола ду маротиба шаҳрвандон ба хизмати ҳарбӣ ба сафи Қувваҳои мусаллаҳ даъват карда мешаванд. Қонуни мазкур синни даъвати шаҳрвандонро аз 18 то 27 муайян намудааст ва тартиби даъват мувофиқи меъёрҳои қонун дар мавсими тирамоҳ ва баҳор сурат мегирад.
Ҳамасола мушоҳида менамоем, ки аксари ҷавонони мамлакат бо ифтихор ва ҳувияти баланди миллӣ ба сафи Қувваҳои мусаллаҳ барои адои хизмати Модар-Ватан мераванд ва сарбаландона марзу буми Тоҷикистонро аз хатару таҳдидҳо ҳимоя менамоянд. Дар баробари ин ҷавононе ёфт мешаванд, ки аз хизмат кардан дар сафи Артиш худдорӣ намуда, бо пеш овардани ҳар гуна баҳона аз хизмат саркашӣ мекунанд. Тибқи қонун, саркашӣ кардан аз хизмат ҷиноят маҳсуб мешавад.
Тавре дар Прокуратураи генералии ҷумҳурӣ иттилоъ доданд, дар Кодекси ҷиноятии Ҷумҳурии Тоҷикистон моддаи махсусе барои саркашӣ аз хизмати ҳарбӣ ва алтернативӣ (м. 343 КҶ Ҷумҳурии Тоҷикистон) муқаррар карда шудааст, ки мувофиқи он, барои саркашӣ аз даъвати навбатӣ ба хизмати ҳатмии ҳарбӣ, ҳамчунин саркашӣ кардани шахси ухдадори ҳарбӣ аз ҷамъомадҳои таълимӣ ё санҷишии ҳарбӣ дар ҳолати набудани асосҳои қонунӣ барои аз ин хизмат озод намудан ҷавобгарии ҷиноятӣ пешбинӣ карда шудааст. Aммo новобаста аз ин баъзе шаҳрвандони синни даъватӣ аз даъват ба хизмати ҳатмии ҳарбӣ саркашӣ намуда, пинҳон мешаванд ё бо ин мақсад ба хориҷи ҷумҳурӣ сафар менамоянд. Инчунин ҳолатҳое низ ҷой доранд, ки даъватшавандагон аз комиссияҳои тиббӣ ва даъватӣ гузаронида шуда, барои даъвати онҳо ба маҳалли хизмат ба онҳо даъватнома дода мешавад, аммо онҳо дар вақти муайяншуда ба комиссариатҳои ҳарбӣ ҳозир нашуда, аз хизмати ҳарбӣ саркашӣ менамоянд ва бо ин кирдорашон ҷиноят содир мекунанд. Дар ин ҷо як нуктаи муҳимро бояд зикр намуд, ки мувофиқи эзоҳи моддаи 343 Кодекси ҷиноятии Ҷумҳурии Тоҷикистон, агар даъватшаванда то ба суд супоридани парванда ба даъватгоҳ ҳозир шавад, ӯ аз ҷавобгарии ҷиноятӣ озод карда мешавад.
Ба гуфтаи сардори Раёсати таъминоти иттилоотии Маркази тадқиқоти стратегии назди Президенти Ҷумҳурии Тоҷикистон Зубайдулло Давлатов, қонун дар давлати ҳуқуқбунёд ҷавҳари ҳама гуна муносибатҳои ҷамъиятӣ буда, давлат ва ҷомеаро ба низом медарорад. «Он ки қонунҳо ин оё он соҳа ва ҷомеаро идора мекунанд, имрӯз ба аксиома табдил ёфтааст ва ҳоҷат ба исбот надорад. Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» маҳз барои бартараф намудани якчанд мушкилот равона шудааст. Аз ҷумла, қонун пешбинӣ менамояд, ки минбаъд дар мақомоти қудратӣ, суд ва прокуратура ҷавононе ба кор қабул карда шаванд, ки хизмати ҳатмии муҳлатноки ҳарбиро адо карда бошанд»,-баёнд дошт коршинос.
Хизмати ҳақиқии ҳарбӣ дар сафи Қувваҳои Мусаллаҳ марҳилаи муҳими ҳаёти ҳар ҷавон ба шумор меравад. Зеро дар артиш ҷавонон на танҳо аз мактаби хуби ҳаёт мегузаранд, балки дӯстони ҳақиқӣ пайдо мекунад ва аз ҷиҳати ҷисмониву маънавӣ обутоб меёбанд. Дар сафи Қувваҳои Мусаллаҳ хизматчии ҳарбӣ имкон дорад, ки худро аз ҳама беҳтарин нишон диҳад, дарк кунад, ки ӯ воқеан ба чӣ қодир аст, зеро дар он ҷо метавонад омодагии хуби ҳамаҷониба гирад, малакаҳои барои ҳаёт муфидро омӯзад, боинтизом шавад, тарзи кори дастҷамъона ва пайдо кардани дӯстони якумраро ёд гирад. Вале аз ҳама муҳим, ҷавонон дӯст доштан ва ҳимоя намудани Ватанро ёд мегиранд.
Ректори Донишгоҳи давлатии ҳуқуқ, бизнес ва сиёсати Тоҷикистон Муъмин Шарифзода иброз медорад, ки хизмат дар сафи Артиши миллӣ баҳри ҳимояи Ватан, марзу буми мамлакат бояд сарбаландона анҷом дода шавад. «Хизмат ба Ватан қарзи ҳар шаҳрванд буда, далериву ҷасурӣ ва ҷавонмардии ҳар нафари бонангу номусро талаб мекунад. Хизмат дар сафи Қувваҳои мусаллаҳ мояи ифтихору сарбаландист. Аслан тарбияи ватанпарастӣ аз оила, кӯдакистон, мактаб оғоз шуда, дар ҷомеа ва ниҳоят, дар сафи Артиши миллӣ рушд меёбад. Дар шуури наврасону ҷавонон бедор сохтани ҳисси муҳаббат ба диёр, мамлакат ва сарзамин вазифаи падару модарон, ҷомеа ва омӯзгорон мебошад»,-изҳор дошт ӯ.
Муъмин Шарифзода пешниҳод менамояд, ки бояд ҷавононро ҳанӯз аз даврони мактабхонӣ ба хизмати Ватан омода намоем. «Ҳар ҷавон пас аз хатми мактаб бояд анҷом додани уҳдадории ҳарбиро вазифаи аввалиндараҷа донад. Барои насли ҷавон яке аз муҳимтарин мактаби обутоб- ин хизмат дар сафи Қувваҳои мусаллаҳи мамлакат аст. Маҳз дар ҳамин ҷо ҷавонписарон шуҷоату мардонагӣ омӯхта, муқаддастарин арзиши ҳаёт, дӯст доштан ва содиқона муҳофизат кардани хоки поки Ватани азизро ёд мегиранд. Бубинед, дар замони Шӯравӣ мо дур аз диёр барои адои қарзи фарзандӣ дар шаҳру ҷумҳуриҳои дур хизмат мекардем. Ҷавонон бояд имрӯз бо дарки баланди масъулият эҳсос намоянд, ки хизмати Ватан — Модар амри заруриву ҷавонмардист»,-афзуд мавсуф.
Имрӯз бояд дар замири ҳар ҷавон муҳаббат нисбат ба Ватан, сарзамин, давлат ва хоки диёр ҷӯш занад. Ҷавонони воқеие ҳастанд, ки бо хоҳиши худ ё баъди хатми донишгоҳҳо ба сафи артиш рафта, хизматро адо намудаанд ва бо эҳсоси баланду ғурури миллӣ ва боварии комил баргаштанд.
Бояд гуфт, ки имрӯз барои ҳар ҷавонмард хизмат дар сафи Қувваҳои мусаллаҳи мамлакат шараф аст. Аз ин рӯ, агар шаҳрванд аз комиссариати ҳарбӣ даъватнома гирифта бошад, ӯ вазифадор аст дар вақти муайяншуда ба он ҷо ҳозир шавад.
Манбаъ: АМИТ «Ховар»
Нет комментариев