Бахшида ба Рўзи ёдбуди бартарафкунандагони садамаи Нерӯгоҳи барқӣ-атомии Чернобил дар шаҳри Хуҷанд чорабинӣ баргузор гардид. Нахуст ба Муҷассамаи ёдгории фавтидагон-бартарафкунандагони садамаи Нерӯгоҳи барқӣ-атомии Чернобил дар «Боғи Ғалаба»-и шаҳри Хуҷанд, ки ба мақсади арҷ гузоштан ба хотири фавтидагон бар асари ин садама бунёд гардидааст, гулчандбар гузошта шуд.
Сипас, маҷлиси тантанавӣ баргузор гардид. Намояндаи Мақомоти иҷроияи ҳокимияти давлатии шаҳри Хуҷанд Ҷамшед Набизода номаи табрикотии Раиси шаҳри Хуҷанд Маъруф Муҳаммадзодаро ба муносибати Рӯзи чернобилчиён ба самъи ҳозирин расонда, аз ҷумла афзуд, ки садамаи радиатсионии Чернобил фалокати мудҳиштарини аср буда, таъсири онро инсоният то ҳол эҳсос менамояд. Мақомоти иҷроияи ҳокимияти давлатии шаҳри Хуҷанд дар оянда низ бо мақсади гиромидошти хотираи онҳое, ки бар асари ин фалокат, аз ҳаёт рафтанд, инчунин таъмини иштироки бевоситаи Чернобилчиён дар чорабиниҳои ҷамъиятӣ, сиёсӣ ва муаммоҳои мавҷуда тадбирҳои судманд меандешад. Мутаасифона бо вуҷуди он, ки аз ин ҳодисаи мудҳиш 33 сол сипарӣ шуда бошад, ҳам вале доғу осори он то ҳол дар ҳаёту фаъолияти иштирокчиёни бартарафкунии ин садама аз байн нарафтааст.
Таъкид гардид, ки гузаронидани Рӯзи ёдбуди бартарафкунандагони садамаи барқии атомӣ, аёдати беморон, қадршиносӣ аз фаъолияти аъзоёни ҷамъияти «Иттифоқи Чернобилчиён», дар арафаи 30-юмин солгарди садамаи Нерӯгоҳи барқӣ-атомии Чернобил гузошта шудани Муҷассамаи ёдгории фавтидагон-бартарафкунандагони садамаи Нерӯгоҳи барқӣ-атомии Чернобил дар «Боғи Ғалаба»-и шаҳри Хуҷанд арҷ гузоштан ба хотири фавтидагон бар асари ин садама ва аз дастгириву ғамхории пайвастаи роҳбарияти шаҳру вилоят дарак медиҳад.
Иттилоъ дода шуд, ки ташкилоти ҷамъиятии «Иттифоқи Чернобил»-и шаҳри Хуҷанд 44 нафар чернобилчиёнро сарҷамъ намудааст, ки аз онҳо 27 нафарашон маъюбони гурўҳҳои 1,2,3 буда, инчунин 23 оилаи бесаробонмонда ба қайд гирифта шудааст.
Сипас ба аъзои «Иттифоқи Чернобил»-и шаҳри Хуҷанд тӯҳфаҳои Раиси шаҳри хуҷанд Маъруф Муҳаммадзода тақдим карда шуданд.
Ҷоиз ба зикр аст, ки санаи 26 апрели соли 1986 бар асари садама дар яке аз агрегатҳои Нерӯгоҳи барқи атомии Чернобил ҳодисаи мудҳише ба вуқӯъ пайваст, ки бар асари он дар якчанд давлатҳои ҷаҳон ифлосшавии радиатсионӣ мушоҳида шуда, аксари аҳолии ҳамшафат зарар диданд. Ҷиҳати бартараф намудани ин ҳодисаи мудҳиш аз Ҷумҳурии Тоҷикистон аз ҷумла, аз шаҳри Хуҷанд низ 120 нафар ҷавонмардон бо ҳисси баланди ватандӯстӣ барои анҷом додани ин амали башардӯстона ширкат варзиданд. Онҳо собит намуданд, ки барояшон амнияти аҳли башар, ободии Ватан ва дӯстии халқҳо арзиши бебаҳо аст. Бар асари оқибатҳои ин садама даҳҳо нафари онҳо ба бемории радиатсионӣ гирифтор шуда, баъзеашон бармаҳал аз ҳаёт рафтанд. Хотираи неки ин фарзандони ҷоннисори Ватан дар дилу дидаи мо абадӣ боқӣ хоҳад монд.
Манбаъ: Дафтари матбуоти Раиси шаҳри Хуҷанд
Нет комментариев