Дар хонаи ақди никоҳи шаҳри Хуҷанд бо иштироки Раиси шаҳри Хуҷанд Маъруф Муҳаммадзода ва як қатор оилаҳои фаъоли шаҳр аз Рӯзи оила таҷлил карда шуд.
Раиси шаҳри Хуҷанд Маъруф Муҳаммадзода ҳозиринро бо Рӯзи байналмилалии оила табрику таҳният гуфта, аз ҷумла таъкид дошт, ки оила рукни асосии ҷомеа маҳсуб меёбад ва аъзои он бо солимиву фаъолнокии худ ба ҷамъият ва давлат нафъи зиёд меоварад. Оила ва оиладорӣ пеш аз ҳама дар асоси ишқи пок ва садоқату вафодорӣ устувор аст. Дар зиндагии оилавӣ сабру таҳаммул ва муросову мадоро мавқеъи муҳим дорад.
Маъруф Муҳаммадзода таъкид дошт, ки мо тоҷикон соҳиби анъанаи хуби оиладорӣ мебошем, ки он ҳамаи масоили марбут ба оила ва муносибату муоширати байни аъзои оиларо дарбар мегирад, ки риоияи он имкон медиҳад, оилаҳои босуботу пойдор ва хушбахт бештар шавад. Асосгузори сулҳу Ваҳдати миллӣ, Пешвои миллат, Президенти кишвар муҳтарам Эмомалӣ Раҳмон дар яке аз суханрониҳои худ қайд намудаанд: «Бидуни оилаҳои мустаҳкаму муқтадир ҷомеаи беолоиш вуҷуд дошта наметавонад. Дар навбати худ, оилаҳои ба мисли садди искандарӣ пойдору нерӯмандро фақат наслҳои рустамсифати филтан ва ба сони Гурдофарид соҳибҷамолу таҳамтан созмон доданаш мумкин асту бас».
Шаҳрдор гуфт, ки аз падару модарон ва тифлакони зебою солеҳи эшон солимии оила таъмин мешавад ва мутаносибан аз оилаҳои комгору саодатманд иморати ҷомеаи мутамаддин қомат меафрозад. Ин нуктаи мухимро мактаби бузурги зиндагӣ собит кардааст.
Дар анҷоми суханронии худ Раиси шаҳри Хуҷанд Маъруф Муҳаммадзода таъкид дошт, ки Мақомоти иҷроияи ҳокимияти давлатии шаҳри Хуҷанд ҳамасола ҷиҳати таҳкими оила, тарғибу ташфиқи тарзи ҳаёти солим, сафарбарии аҳли ҷомеа ба бундёкоиву созандагӣ тадбирҳои мушаххас меандешад. Ҳамзамон оилаи солим аз зану шавҳар иҷрои вазифаҳои ахлоқӣ, ҳуқуқӣ, ҳамкорӣ, иқтисодию машӣ, ҳамдигарфаҳмӣ, сабру тоқат, андеша, эҳтироми якдигар ва тарбияи комили фарзандонро талаб менамояд.
Сипас, аз ҷониби Раиси шаҳри Хуҷанд Маъруф Муҳаммадзода ба 6 ҷуфт оилаҳои намунавии шаҳри Хуҷанд, аз ҷумла оилаи адибон Наҷимовҳо аз маҳаллаи Масҷиди Савр, оилаи барқароркунандагони сохти конститусионӣ Раҳимовҳо аз маҳаллаи Тути калон, оилаи кормандони соҳаи ободонии шаҳр Нишоновҳо аз маҳаллаи Суғдиён, оилаи зиёиён Қосимовҳо аз маҳаллаи Сайҳун, оилаи маорифчиён Бобоҷоновҳо аз маҳаллаи Навбаҳор ва оилаи ҷавон Ҷалоловҳо аз маҳаллаи 1 май роҳхати сафари 3 рӯза ба шаҳри бостонии Самарқанд ва китоби тозанашри «Нигина ва Мирмалик»-и адиби шинохта Додохони Эгамзод дар вазъияти тантанавӣ тақдим карда шуд.
Ёдовар мешавем, ки соли гузашта низ чунин иқдом аз ҷониби шаҳрдорӣ, яъне ташкили сафари оилаҳои намунавӣ ба шаҳри бостонии Самарқанд дар Рӯзи байналмилалии оила сурат гирифта буд.
Манбаъ: Дафтари матбуоти Раиси шаҳри Хуҷанд
Нет комментариев