INTEL дастгирии нерӯгирии беноқилро барои смартфону ноутбукҳо илова мекунад

Солҳои охир, миқдори дастгоҳҳое, ки нерӯгирии мунтазамро талаб мекунанд, аз қабили смартфон, ноутбук, планшет, соатҳо, смарт-дастпонаҳо, гарнитураҳо ва ҳоказо хеле афзудаанд. Ноқилҳо барои ҳамаи ин рангорангӣ баъзан байни ҳамдигар иваз шуда, ҳусни хонаро безеб месозанд ва аксар вақт ба куҷое гум мешаванд. Аммо Intel, мехоҳад, ки ин мушкилиро, рӯзҳои наздиктарин бартараф созад.

Дар видео кори Rezence намоиш дода шудааст.

Кумар Чиннасвами, ки нерӯгирии беноқилиро дар Intel Experience Group муаррифӣ мекунад, ба Focus Taiwan иброз намудааст, ”Сертификатсиякунонии якчанд смартфонҳое, ки дорои нерӯгирии беноқилианд, рӯзҳои наздик гузаронида мешаванд. Чунин телефонҳо, нимаи аввали соли 2015 ба бозор ворид мешаванд”.

Нахустин планшет ва ноутбукҳо, бо истифодаи технологияи нави нерӯгирӣ соли 2015 пайдо хоҳанд шуд. Чиннасвами ҳамчунин қайд намудааст, ки дастгоҳҳои буҷавӣ дар пойгаҳи Intel Core M, ин имкониятро каме дертар, солҳои 2016 ё ин ки 2017 ба даст хоҳанд овард.

Нерӯгирии беноқилӣ, қисме аз нақшаҳои Intel ба ҳисоб меравад. Ширкат кӯшиш мекунад, ки ба воситаи технологияҳояш аз ноқилҳои клавиатура, мушча, монитор ва дискҳои мустаҳками берунӣ (жёсткий диск) раҳоӣ ёбад. Intel технологияи нерӯгирии беноқилии Rezence-ро аз A4WP (Alliance for Wireless Power) ҷонибдорӣ мекунад. Шумораи иштирокдорони иттиҳод 135 ширкатро дар бар мегирад. Аз ҷумла, Qualcomm, Samsung, Asus ва Acer, дар ҳайси рақиби асосӣ бошад WPC (Wireless Power Concortium), ки дар рушди намунаи Qi саҳмгузор аст, баромад мекунад.