Аз 23 август то 5 сентябр дар доираи Бозиҳои VI байналмилалии артишӣ «АрМИ-2020» чорабиниҳои озмуни «Биатлони танкӣ» баргузор мегарданд. Зимни баргузории ин озмун нуҳумин маротиба экипажи танкии аз ҷиҳати касбӣ пурзӯртарин муайян карда мешавад, хабар медиҳад мухбири АМИТ «Ховар».
Тибқи иттилои Федератсияи байналмилалии биатлони танкии Россия, хусусияти Бозиҳои дарпешистода, дар муқоиса бо бозиҳои қаблӣ дар ин аст, ки онҳо бо Ҳамоиши VI байналмилалии ҳарбӣ-техникии «АрМИ-2020» аз 23 то 29 август якҷо баргузор мешаванд.
Ифтитоҳи бозиҳои байналмилалии артиши «АрМИ-2020» 23 август сурат мегирад.
Дар биатлони танкӣ имсол зиёда аз 200 танкчӣ аз 16 кишвар (Тоҷикистон, Ӯзбекистон, Россия, Абхазия, Осетияи Ҷанубӣ, Озарбойҷон, Беларус, Қазоқистон, Қирғизистон, Конго, Чин, Ветнам, Лаос, Мянма, Сербия,) иштирок хоҳанд кард. Бори аввал дар он дастаи мунтахаби Қатар ширкат меварзад.
Аз рӯи натиҷаҳои ҳунарнамоиҳо дар соли 2019 16 даста ба ду дивизион тақсим шуда буданд. Ба дивизиони аввал дастаҳои мунтахаби Озарбойҷон, Беларус, Қазоқистон, Чин, Қирғизистон, Россия, Сербия, Ӯзбекистон ва дар дивизиони дуввум дастаҳои мунтахаби Абхазия, Ветнам, Қатар, Конго, Лаос, Мянма, Тоҷикистон, Осетияи Ҷанубӣ шомил гардиданд.
Дар марҳилаи аввал — «Пойгаи инфиродӣ» аз 23 то 30 август беҳтарин экипажи танкӣ, аз 1 сентябр то 2 сентябр дар эстафетаи нимфиналӣ чаҳор дастаи мунтахаби беҳтарин (аз рӯи вақт), 4 сентябр беҳтарин дастаи мунтахаби дивизиони дуюм ва 5 сентябр, дар рӯзи пӯшидани “АрМИ-2020” — ғолиби озмуни “Биатлони танкӣ” муайян карда мешаванд.
Тавре сардори маркази матбуоти Вазорати мудофиаи Ҷумҳурии Тоҷикистон, полковник Фаридун Маҳмадализода ба АМИТ «Ховар» хабар дод, аз ҷумҳурии мо дар биатлони танкӣ 4 экипажи танкӣ зери раҳбарии муовини фармондеҳи қӯшунҳои хушкигард оид ба аслиҳа ва техникаи ҳарбӣ Маҳмадалӣ Ашуров ширкат меварзанд.
Ин бори аввал нест, ки экипажҳои мо дар биатлони танкӣ иштирок мекунанд. Соли 2019 чаҳор экипажи танкӣ ва як гурӯҳи кумаки техникии Вазорати мудофиаи Ҷумҳурии Тоҷикистон дар онҳо ширкат варзида буданд.
Дастаҳои ширкаткунанда ба ду дивизион тақсим шуданд. Тақсимот дар асоси рейтинги дастаҳо, ки аз рӯи натиҷаҳои мусобиқаҳои соли гузашта тартиб дода шудаанд, сурат гирифт. Тоҷикистон ба дивизиони дуввум ҳамроҳ бо Кувайт, Мянма, Ветнам, Лаос, Зимбабве, Африқои Ҷанубӣ, Уганда, Ӯзбекистон, Ангола, Судон, Куба ва Шри — Ланка шомил шуд.
Танкчиёни Тоҷикистон дар панҷ чемпионати қаблии «Биатлони танкӣ» бомуваффақият баромад карда, соҳиби мукофоти гуногун шудаанд.
Манбаъ: АМИТ «Ховар»
Нет комментариев