Дар пойтахти Тоҷикистон то як соли дигар корхонаи нави мошинбарорӣ арзи ҳастӣ мекунад, ки тавони истеҳсоли автобусу мошинҳои боркашро хоҳад дошт.
Барномаи нав, ки дар мувофиқа бо як ширкати туркӣ роҳандозӣ шудааст, ваъда медиҳад, ки корхонаи нав аллакай баъди як сол ба тавлиди маҳсулоти “Сохтаи Тоҷикистон” шурӯъ кунад.
Фаррух Ҳамрализода, раиси Кумитаи давлатии сармоягузорӣ ва амволи давлатӣ рӯзи 1-уми август дар нишасти матбуотӣ дар Душанбе хабар дод, ки дар рӯзи охири моҳи июл ҳукумати Тоҷикистон қарори таъсиси корхонаи мошинбарориро дар шаҳри Душанбе тасвиб кард. Ба гуфтаи ҷаноби Ҳамрализода, ин корхона бо ҷалби 20 миллион доллари амрикоии як ширкати туркӣ бунёд мешавад.
«Дирӯз ҳукумати Тоҷикистон қарори махсусеро дар ин замина тасвиб кард. Аз ҷониби Тоҷикистон ширкати «AvestoGRUPP» масъули ин тарҳ мебошад. Дар марҳилаи аввал ин корхона солона то 200 адад автобус тавлид мекунад. Дар марҳилаи дигар тавлиди мошинҳои боркаши иқтидораш аз 3 то 8 тонна ва ҳамчунин микроавтобусҳо пешбинӣ шудааст. Микроавтобусҳо бо тамғаи «Мерседес» тавлид мешаванд. Ҳамаи маҳсулоти ин корхона бо тамғаи «Дар Тоҷикистон истеҳсол шудааст» ба фурӯш бароварда мешавад», — гуфт Ҳамрализода.
Ба гуфтаи Ҳамрализода, дар корхонаи Душанбе мошинҳо бастубанд мешаванд ва дар навбати аввал истеҳсоли 100 автобуси «Сохташуда дар Тоҷикистон» пешбинӣ гардидааст.
Асрор Мирзоев, мудири кулли ҶДММ «AKIA-Авесто” мегӯяд, ки сохтмони корхонаи нави мошинсози баҳори соли ҷорӣ шурӯъ шуда, ҳоло коргоҳи насби автобусҳо дар маҳаллаи Гулбуттаи шаҳри Душанбе ҷойгир шудааст. Ба гуфтаи вай, ҳамзамон дар коргоҳи собиқи насби троллейбусҳо ҷамъоварии автобусҳои “AKAI” идома дорад.
“Бо идомаи раванди сохтмони ин корхона мо бо бархе аз ширкатҳои машҳури мошинсозӣ, назири “Мерседес”, “Ҳундай”, “Киа”, “Пежо” ва ғайра барои тавлиди мошинҳои боркаш музокиротро идома медиҳем. Бо “Мерседес” музокирот ба тундӣ пеш меравад, зеро онҳо маблағи бештар мехоҳанд. Дар умум, вақте тавлиди мошинҳоро роҳандозӣ кардем, он бо тамғаи “Дар Тоҷикистон истеҳсол шудааст” ба фурӯш бароварда мешавад. Мехоҳем автобусу мошинҳои боркашро ба Қирғизистону Қазоқистон ва Афғонистон содир кунем. Зеро дар миёни кишварҳои ИДМ корхонаи мо аввалин ширкатест, ки навъи мошинҳои каммасрафи “ЕВРО 5”-ро тавлид мекунад”, — гуфт Асрор Мирзоев.
Нет комментариев