Дар вохӯрии даври чоруми мусобиқаи гурӯҳии Ҷоми Конфедератсияи футболи Осиё (КФО)-2016 қаҳрамони чоркаратаи Тоҷикистон, дастаи футболи «Истиқлол» дар бозӣ бо тими «Нафит Ал-Васат»-и Ироқ дар майдони худ бо ҳисоби 0 бар 1 ба шикасти навбатӣ дучор шуд.
Бино ба иттилои сомонаи расмии дастаи «Истиқлол», тӯби ягонаро дар ин бозӣ меҳмонон дар дақиқаи 90+2 ба ҳадаф расонидаанд.
Баъди ин шикаст дастаи «Истиқлол» дигар тамоми имконоти раҳёбӣ ба марҳилаи дигари Ҷоми Конфедератсияи футболи Осиё-2016-ро аз даст дод.
Ҳамин тариқ, дар гурӯҳи «В» пас аз чор давр дастаи «Истиқлол» бо 1 имтиёз (1 мусовӣ ва 3 бохт) зинаи охирини чорумро ишғол намуда, ҳатто дар сурати пирӯзӣ дар ду давари боқимонда низ ба роҳхат ба даври дигари мусобиқа соҳиб намешавад.
Дар гурӯҳи «В» зинаи аввалро бо 9 имтиёз — «Нафит Ал-Васат»-и Ироқ, зинаи дуюмро бо 8 имтиёз — «Ал-Файсалӣ»-и Ӯрдун ва мақоми сеюмро бо 4 имтиёз тими «Триполи»-и Лубнон ишғол мекунанд.
Манбаъ: http://news.tj/
Нет комментариев