Дар маҷлисгоҳи осоишгоҳи «Баҳористон» ҷаласаи гуруҳи кории байниидоравӣ оид ба тариқи таҷрибавӣ таҳия ва ҷорӣ намудани буҷети шаҳрак ва деҳот баргузор шуд.
Дар кори ҷаласа Мушовири калони Президенти Ҷумҳурии Тоҷикистон оид ба сиёсати ҳуқуқӣ Хурсанмурод Мирзоев ва муовини Раиси вилояти Суғд Анвар Яъқубӣ иштирок намуданд.
Дар ҷаласа гуфта шуд, ки дар сохтори идоракунии маҳаллии Тоҷикистон идоракунии маҳаллӣ, ки дар ҳудуди шаҳрак ва деҳот амалӣ карда мешавад, ҷойи махсусро ишғол менамояд.
Тавре зикр гардид, Қонуни ҶТ «Дар бораи худидоракунии шаҳрак ва деҳот» ваколатҳо, асосҳои иқтисодию молиявии мақомоти худидоракунии шаҳрак ва деҳотро муайян намудааст. Бо назардошти ин қонун ҷамоатҳо буҷети шаҳрак ва деҳотро қабул мекунанад ва дар ҳолати зарурӣ ба он тағйирот ва иловаҳо ворид месозанд, инчунин иҷрои онро назорат мекунанд. Вале то ба имруз ин талаботи қонун иҷро нашудааст ва ин ба мақомоти худидоракунии шаҳрак ва деҳот имкон намедиҳад, ки вазифаҳои худро дар ҳалли масъалаҳои иҷтимоӣ, иқтисодӣ ва фарҳангии аҳамияти маҳаллидошта амалӣ намоянд.
Оид ба зарурат ва заминаҳои қабул кардани буҷети ҷамоатҳои шаҳрак ва деҳот шарҳи гуруҳи кори шунида шуда, иттилоъ дода шуд, ки 26 июни соли 2013 бо супориши Роҳбари Дастгоҳи иҷроияи Президенти Ҷумҳурии Тоҷикистон бо мақсади ба тариқи таҷрибавӣ амалӣ намудани меъёрҳои Қонуни ҶТ «Дар бораи худидоракунии шаҳрак ва деҳот» вобаста ба иҷрои ваколатҳои ҷамоатҳои шаҳраку деҳот дар таҳия намудани буҷети ин мақомот, ҳамзамон барои ташкили сохтори ҳамоҳангсозии ин раванд Гуруҳи кории байни идоравӣ ташкил карда шудааст. Ба ҳайати гуруҳи корӣ муовинони вазири молия, вазири рушди иқтисод ва савдо, адлия, Кумитаи давлатии сармоягузорӣ ва идоракунии амволи давлатӣ, Кумитаи андози назди Ҳукумати ҶТ, намояндагони мақомоти иҷроияи ҳокимияти давлатӣ шомил шудаанд. Сардори гуруҳи корӣ Мушовири калони Президенти Ҷумҳурии Тоҷикистон оид ба сиёсати ҳуқуқӣ Хурсанмурод Мирзоев буда, дастгирии техникии гуруҳи корӣ аз ҷониби Агентии ИМА оид ба рушди байналмиллалӣ — ЮСАИД таъмин карда мешавад.
Тавре қайд гардид, аз ҷониби гуруҳи корӣ аллакай руйхати ҷамоатҳои таҷрибавӣ таҳия карда шудааст. Ба ин руйхат ҷамоати Сучони ноҳияи Шуғнон, шаҳркаи Ёвони ноҳияи Ёвон, ҷамоати деҳоти Карим Исмоилови ноҳияи Ваҳдат ва шаҳраки Ғафурови ноҳияи Бобоҷон Ғафуров дохил мебошанд.
Ҷаласаи гуруҳи кории байниидоравӣ оиди тариқи таҷрибавӣ таҳия ва ҷорӣ намудани буҷети шаҳрак ва деҳот давоми ду руз идома меёбад. Дар назар аст, ки гуруҳи корӣ аз шаҳраки Ғафуров ва ҷамоатҳои Исфисор ва Ҳайдар Усмонови ноҳияи Бобоҷон Ғафуров, инчунин аз чанд мавзеъҳои шаҳри Хуҷанд дидан намоянд.
Дар ин бора http://sugd.tj/tj/navidi-sugd/5082-bahoriston.html
Нет комментариев