Дар хиёбони ба номи Раҳим Ҷалили шаҳри Хуҷанд маросими расми кушоди лавҳаи ёдгорӣ ва иваз намудани номи кўчаи Энгелс ба номи Домуллоҷон Ҷабборов баргузор гардид.
Фирӯза Нуруллозода, муовини Раиси шаҳри Хуҷанд дар маросими мазкур иштирок намуда, аз ҷумла зикр дошт, ки Мақомоти иҷроияи ҳокимияти давлатии шаҳри Хуҷанд низ дар баробари арҷгузорӣ ба шахсияти бузургмардони миллатамон ва омўзиши амиқу ҳамаҷонибаи осори онҳо вазифадор аст, ки ин мероси ҷовидониро ба хотири тарбияи наврасону ҷавонон дар рўҳияи башардўстиву инсонпарварӣ, ватанхоҳиву ватандорӣ, илму ҳунаромўзӣ ва аҳлоқи ҳамида истифода намояд.
Дар ин ҷода пардабардорӣ намудан аз лавҳаи ёдгории шахси накўном, марди қави-иродаву мубориз, ташкилотчии бомаҳорат, фидоиву нексиришт Ҷабборов Домуллоҷон Ҳоҷи-евич дар ҳаёти ичтимоиву фарҳангии шаҳри Хуҷанд рўйдоди воқеан хотирмон мебошад.
Иттилоъ дода шуд, ки ин чорабинӣ бо мақсади иҷрои дастуру супоришҳои Роҳбарияти Ҳукумати Ҷумҳурии Тоҷикистон дар бораи номгузорӣ дар шаҳр барои иваз намудани номгузории якчанд кўчаҳои шаҳр, ки яке аз онҳо кўчаи Энгелс мебошад ва тибқи ин дастур қарори Маҷлиси вакилони халқи шаҳри Хуҷанд, даъвати панҷум аз 20 июни соли 2018, таҳти №243 “Дар бораи иваз намудани номи кўчаи Энгелс ба номи Ҷабборов Домуллоҷон Ҳоҷиевич” ба тавсиб расидааст.
Изҳори умед карда шуд, ки фарзандони Домуллоҷон Ҷабборов дар хуррам ва ободонии кӯчаи мазкур саҳмгузорӣ намуда, онро ба яке аз кӯчаҳои зеботарини шаҳр мубаддал мегардонанд.
Сипас, наздикону пайвандон ва ҳамкорон, аз ҷумла Юсуф Ҷабборов, Нодирҷон Солиҷонов ва Муҳсинҷон Ҷабборов баромад намуда, аз ин иқдоми Давлату Ҳукумат изҳори хушнудӣ ва миннатдорӣ намуданд.
Бояд қайд кард, ки фаъолияти меҳнатии Домуллоҷон Ҷабборов баробари ба итмом расидани таҳсил дар мактаби олӣ дар заводи нўшокиҳои ташнашикани шаҳри Ғафуров аз вазифаи муҳосиб оғоз гардида, солҳои баъдин дар корхонаҳои калони саноатии шаҳри Хуҷанд ба сифати сармуҳосиб, сариқтисодчӣ идома додааст.
Рушди яке аз калонтарин корхонаҳои соҳаи саноати сабуки шаҳру вилоят ва ҷумҳурӣ – иттиҳодияи дўзандагии ба номи Крупскаяи маркази вилоят дар солҳои 80-уми асри гузашта, аз бисёр ҷиҳат ба фаъолияти Домуллоҷон Ҷабборов барин мутахассисони соҳибмаърифату кордон алоқамандӣ дорад. Давоми 15 соли ба ҳайси сармуҳосиб ва сариқтисодчии ин корхонаи азим адои фаъолият намуданаш Домуллоҷон Ҷабборов натанҳо маҳорати комили касбӣ ва таҷрибаи мукаммали ҳаётӣ пайдо кард, балки ҳамчун мутахассиси варзида дар саросари вилоят эътибори хоса ба даст овард.
Бо назардошти дониш ва таҷрибаю маҳорати касбӣ Домуллоҷон Ҷабборовро соли 1996 ба нозироти андози шаҳри Хуҷанд даъват намуданд. Дар он ҷо ў ба ҳайси мудири шўъба як солу панҷ моҳ адои фаъолият намуд ва моҳи сентябри соли 1997 муовини Раиси шаҳр таъин гардид.
Муддати 5 соли фаъолияти Домуллоҷон Ҷабборов дар ин вазифа, ки самти иқтисодиётро роҳандозӣ мекард, шаҳри Хуҷанд дар бобати пешбурди иқтисодӣ ба натиҷаҳои назаррас ноил шуд.
Солҳои минбаъда Домул-лоҷон Ҷабборов муовини Раиси кумитаи иқтисод ва савдои вилоят, муовини аввали сардори идораи молияи вилоят шуда кор кард ва роҳбарияти вилоят маҳорати касбӣ ва ташкилотчигиашро ба ҳисоб гирифта соли 2004-ум ўро муовини Раиси вилояти Суғд таъин намуд.
Аз моҳи апрели соли 2007 то моҳи марти соли 2008 вазифаи сардори Раёсати Агентии давлатии суғуртаи иҷтимоӣ ва нафақаи вилоятро ба ўҳда дошт. Аз моҳи марти соли 2008-ум муовини аввали Раиси шаҳри Хуҷанд таъин гардидааст.
Домуллоҷон Ҷабборов ҳамчун узви Ҷамъияти «Дониш»-и вилоят тавассути дарсгўӣ дар курсҳои тайёркунии корман-дони муҳосибот ба бештар аз 1000 нафар шогирдон ихтисоси муҳосибиро омўзондааст. Ҳамчунин дар курсҳои тайёр кардани кормандони мунисипалӣ дарс гуфта, муаллифи китоби «Молияи мунисипалӣ» мебошад, ки он барои мутахассисони соҳаи молия дастури арзишнок аст.
Мавсуф узви Ҳизби Халқи Демократии Тоҷикистон буд ва аз соли 2010 то соли 2015 вакили Маҷлиси намояндагони Маҷлиси Олии Ҷумҳурии Тоҷикистон, даъвати чорум интихоб гардидааст.
Домуллоҷон Ҷабборов 1 сентябри соли 2017 дар синни 64 солагиаш вафот карда бошад ҳам, номи неку корҳои шоистаи ў дар дилу дидаи мардуми хуҷандиён абадӣ маскан гирифтааст ва барои абадӣ гардонидани хотираи ин шахси нексиришт кўчаи мазкур ба номи Ҷабборов Домуллоҷон Ҳоҷиевич гузошта шуд.
Манбаъ: Дафтари матбуоти Раиси шаҳри Хуҷанд
Нет комментариев