Имрӯзҳо дар қаламрави шаҳри бостони Хуҷанд баҳри истиқболи сазовори 30-солагии Истиқлолияти давлатии Ҷумҳурии Тоҷикистон корҳои созандагию бунёдкорӣ ва ободонӣ вусъати тоза мегирад. Он дар асоси Фармони Президенти Ҷумҳурии Тоҷикистон «Дар бораи ҷашни 30-солагии Истиқлолияти давлатии Ҷумҳурии Тоҷикистон», қарори Раиси вилояти Суғд «Дар бораи вусъат бахшидан ба корҳои созандагию бунёдкорӣ, ободию кабудизоркунии маҳали зист ва сазовор истиқбол гирифтани ҷашни 30-солагии Истиқлолияти Ҷумҳурии Тоҷикистон» ва қарори Раиси шаҳри Хуҷанд «Дар бораи эълон намудани 1300 рӯзи ободонию созандагӣ ба истиқболи 30-солагии Истиқлолияти давлатии Ҷумҳурии Тоҷикистон» роҳандозӣ гаштааст. Баробари ба тасвиб расидани фармону қарорҳои дар боло зикршуда, тамоми ташкилоту муассисаҳои шаҳри бостонии Хуҷанд нақша –чорабиниҳо тартиб доданд ва фаъолияти худро дар асоси он ба роҳ монданд. Ин буд, ки аллакай дар шаҳри Хуҷанд аз 510 иншооти ба нақшагирифташуда зиёда аз 200 адади он мавриди истифодабарӣ қарор гирифтанд ва зиёда аз 1000 нафар ҷойи нави корӣ ба вуҷуд омад.
Дар баробари бунёдкориҳо дар шаҳри Хуҷанд ҳамзамон корҳои ободониву гулкорӣ ва мумфаршкунии роҳҳо вусъати тоза мегиранд. Аз 35, 8 километр нақшаи пешбинишудаи мумфаршкунии роҳҳои шаҳри Хуҷанд дар соли 2019, аллакай 4 кӯчаи асосии шаҳр бо дастгирии Мақомоти иҷроияи ҳокимияти давлатии вилояти Суғд пурра мумфарш карда шуд. Ҳамчунин бо маблағгузории Мақомоти иҷроияи ҳокимияти давлатии шаҳр аз ҷониби Муассисаи давлатии нигоҳдории роҳҳои шаҳри Хуҷанд корҳои мумфаршкунӣ амалӣ карда мешаванд. Ин тадбирҳои давлатӣ боиси қаноатмандӣ ва руҳбаландии аҳолӣ гардида, дар ҳар як маҳаллаву кӯчаҳои шаҳр ташаббусҳои наҷиби саҳмгузорӣ дар ободонӣ ва мумфаршкунии кӯчаҳо сурат гирифта истодааст. Чунин ташаббусҳои хайрхоҳона дар зиёда аз 10 кӯчаҳои шаҳр амалӣ карда шуд.
Дар рӯзҳои истироҳатии ҳафтаи сипаришуда аз ҷониби Раиси шаҳри Хуҷанд Маъруф Муҳаммадзода ба мумфаршкунии боз як кӯчаи шаҳр, роҳи кӯчаи Инъом Деҳқонови маҳаллаи Ваҳдат ҳусни оғоз бахшида шуд. Бояд қайд намуд, ки кӯчаи мазкур дар маҳаллаи навбунёд воқеъ гардида, дарозии он 500 метру бараш 6 метр мебошад ва ҳаҷми умумии корҳои мумфаршкунӣ беш аз 3000 метри мураббаъро ташкил медиҳад. Дар ин амали дастҷамъона саҳми бошандагони кӯча низ назаррас аст.
Ҷоиз ба зикр аст, ки таҷдиду азнавсозӣ ва мумфаршкунии роҳҳо тибқи дастуру супоришҳои Асосгузори сулҳу Ваҳдати миллӣ, Пешвои миллат Президенти мамлакат муҳтарам Эмомалӣ Раҳмон сурат гирифта, бо харҷи маблағҳои буҷавӣ, саҳми соҳибкорон ва аҳолӣ он вусъат дода мешавад. То ҷашни 30 солагии Истиқлолияти давлатии Ҷумҳурии Тоҷикистон аксарияти кӯчаҳои шаҳри Хуҷанд мумфарш хоҳанд шуд.
Манбаъ: Дафтари матбуоти Раиси шаҳри Хуҷанд
Нет комментариев