Каду  беш аз 5000 сол пеш,  аз ҷониби инсон омӯхта шуда, ба шарофати мазза ва хусусиятҳои ғизонокиаш то имрӯз маъмул боқӣ мондааст. Ин сабзавот ба осонӣ метавонад аз рӯйи шумораи моддаҳои муфиди ғизоии манфиатовари худ, бо дигар намуди сабзавот рақобат кунад.

Ба фикрам нафаре нест, ки боре маззаи  самбӯсаи кадугинро начашида бошад. Дар гузашта, аз каду ба ҷуз самбӯса, ҳамчунин, шавла ва дигар хӯрокҳо омода менамуданд.

Мавҷудияти микроэлементҳо ва витаминҳоро дар таркиби каду ба инобат гирифта, онро барои муолиҷаи ҳамаи намуди бемориҳои дилу раг, омос (отёк), камхунӣ ва фарбеҳшавӣ тавсия медиҳанд.

Вақте ки ба кадуи тиллоранг назар меафканед, фикр мекунед, ки он ба худ тамоми қувваи офтобро ҷаббида гирифта, кунун тайёр аст онро ба мо диҳад. Навъҳои норанҷии каду дорои бета-каротин буда, он якчанд маротиба аз сабзӣ бештар аст. Каротини каду шифобахш буда, он барои фаъолияти дурусти организм хеле зарур аст.

Каду аз элементҳои оҳан, мис, кобалт ва руҳ хеле бой аст. Бояд гуфт, ки дар таркиби каду намакҳои руҳ хеле зиёд буда, он ба ҷисми инсон тавоноӣ мебахшад.  Дар Ҳиндустон кадуро ба шарофати дар таркибаш мавҷуд будани витамини Е қадр мекунанд, зеро он қодир аст, ки пиршавии бармаҳалро пешгирӣ намояд.

Азбаски дар таркиби каду фосфор, мис ва фтору оҳан зиёданд, он дар байни дигар намуди сабзавот хеле пешсаф аст.  Меваҳои он аз пектин, қанд, витамини гурӯҳҳои  В, С, Д ва каротин бой мебошанд.  Гӯшти каду вазифаи заҳрадонро беҳтар намуда, илтиҳоби меъдаро дур мекунад. Ҳангоми мушоҳида гардидани туршии аз ҳад зиёд дар меъда, нӯшидани шарбати кадуро тавсия медиҳанд.

Шавлаи он  ҳатто баландшавии аз ҳад зиёди баданро, ки ба бемории роҳи нафас вобастааст, рафъ месозад. Шарбати каду дар муолиҷа намудани шамолхӯрии оддӣ низ беназир аст. Он дарди гулӯро бартараф намуда, иммунитети баданро мустаҳкамтар менамояд. Ҷоизи қайд аст, ки шарбати каду сири дандонро мустаҳкам карда, пӯсиши дандонро пешгирӣ менамояд.

Ҷӯшонидаи каду бо асал, на танҳо нӯшокии болаззат аст, балки воситаи оромибахшанда барои онҳое мебошад, ки аз бедорхобӣ азият мекашанд. Каду инчунин, метавонад бисёр мушкилоти пӯстро бартараф кунад.  Шавла аз гӯшти каду метавонад ҷойҳои сӯхта ва илтиҳобро муолиҷа кунад. Ҷароҳатҳои фасоддор, ки бо ҷӯшонидаи гулҳои каду тоза карда шудаанд, ба зудӣ шифо меёбанд.  Донаи каду, хӯрдании лазиз барои кӯдакон маҳсуб ёфта, воситаи хубест барои нобуд кардани киҷҷа.

Ба шарофати дар таркибаш мавҷуд будани витамини нодири Т кадуро мумкин аст, ки дар  якҷоягӣ бо хӯрокҳои серравған истеъмол намуд, зеро витамини T барои пешгирӣ намудани фарбеҳшавӣ кӯмак мерасонад.

Каду дорои хусусиятҳои косметикӣ низ мебошад. Ба ин хотир, онро аксар вақт ба таркиби равғанҳои гуногуни молиданӣ ва мушк илова мекунанд. Масалан, истифода бурдани ниқоб аз каду барои рӯйи равғанин хеле муфид аст. Аз каду се қошуқ шавлача тайёр намуда, ба таркибаш зардии тухм ва як қошуқча асал илова кунед, сипас онро 10-15 дақиқа дар рӯй нигоҳ дошта, бо оби хунук шӯед. Барои халос шудан аз гармичаҳо ва тобиши равғанин дар рӯй тоза кардани пӯсти рӯй бо пораи каду хеле мувофиқ аст.

Барои рӯйҳои хушк бошад, метавонед аз 2 қошуқ кадуи дар об ҷӯшонидашуда шавла омода намуда, ба таркибаш 1 қошуқ равғани зайтун ва ё дигар намуди равғанро илова кунед, баъдан маводи ҳосилшударо ба рухсора молед. Сипас онро 20 дақиқа дар рӯй нигоҳ дошта, бо оби хунук шуед. Ин амал рӯйро зебо намуда, ба он тароват мебахшад.

Дар пеш моро Иди соли нав интизор аст. Тавсия медиҳем, ки ҳангоми омода намудани хӯрокҳо ва хуришҳои гуногуни равғанин ҳатман аз каду низ истифода баред. Тавре гуфтем, он барои пешгирӣ намудани фарбеҳшавӣ хеле муфид аст ва ҳамчунин, метавонад барои ҳазми хӯрок мусоидат намояд.

Боқӣ, бароятон дар Соли нави 2016-ум саломатии бардавом ва хонаи ободро таманно дорем!