Кишоварзони ноҳияи Мир Сайид Алии Ҳамадонӣ дар майдони 8410 гектар кишти такрорӣ гузарониданд, ки аз он 5877 гектарро ғалладонагӣ, 1067 гектарро сабзавот ва 370 гектарро полезӣ ташкил медиҳад.
Тавре сардори Раёсати кишоварзии ноҳия Тоҳирҷон Рафиев ба АМИТ «Ховар» иттилоъ дод, кишоварзони ноҳия дар соҳаи сабзавоткорӣ таҷрибаи бой дошта, соли гузашта дар майдони 380 гектар пиёз, 90 гектар сабзӣ, 210 гектар помидор, 120 гектар бодиринг ва 50 гектар карам кишт намуданд.
Изҳор гардид, ки ҳосилнокӣ аз ҳисоби зироати сабзавотӣ хуб буда, 14 ҳазору 741 тонна пиёз, 2727 тонна сабзӣ, 6741 тонна помидор, 3720 тонна бодиринг, 1581 тонна карам ва боқимонда 780 тонна дигар намуди сабзавот ҷамъоварӣ гардидааст.
Ҳоло дар заминҳои хоҷагиҳои деҳқонии ноҳия чиниши сабзӣ, карам ва турб идома дошта, 1 кг сабзӣ аз 80 дирам то як сомонӣ арзиш дорад, ки як баробар аз нархи бозор арзонтар фурӯхта мешавад.
Хоҷагидорон кӯшиш ба харҷ медиҳанд, ки ҳосили дастранҷи худро сари вақт ва беталаф ҷамъоварӣ намуда, онро бо нархи дастрас пешкаши харидорон намоянд.
Манбаъ: АМИТ «Ховар»
Нет комментариев