Дар шаҳру ноҳияҳои вилояти Хатлон кишоварзону хоҷагидорон ба мавсими нави кишту кор омодагӣ мебинанд, хабар медиҳад хабарнигори минтақавии АМИТ «Ховар» Сулаймон Холзода.
Бо мақсади татбиқи амалии супоришҳои Ҳукумати Ҷумҳурии Тоҷикистон дар самти кишоварзӣ сокинони вилояти Хатлон аз тамоми имконияти мавҷуда ба таври васеъ истифода менамоянд.
Дар ин самт яке аз омилҳои асосии рушд- ин таъмини саривақтии хоҷагидорону кишоварзон бо оби полезӣ мебошад. Масъулину мутахассисони Раёсати беҳдошт замин ва обёрии вилояти Хатлон дар якҷоягӣ бо идораҳои зертобеи худ дар шаҳру ноҳияҳо барои омода намудани шабакаҳои обтаъминкунӣ дар мавсими нави обёрӣ то имрӯз корҳои заруриро ба анҷом расонидаанд. Дар баробари вусъати корҳои омодагӣ, бахусус тоза намудани заҳбуру заҳкашҳо ва таъмини пойгоҳҳои обкашӣ ҳамзамон ҷиҳати обмонии захиравӣ дар майдонҳои киштшаванда ва боғу токзор хоҷагидоронро бо оби полезӣ ба таври ройгон таъмин менамоянд.
Ҷайҳун аз калонтарин ноҳияҳои кишоварзӣ дар вилояти Хатлон маҳсуб шуда, дорои зиёда аз 18 ҳазор 700 гектар замини корами обӣ мебошад, ки ҳамасола аз он кишоварзон ҳосили фаровони маҳсулоти гуногун ба даст меоранд. Майдони беш аз 8500 гектар тавассути 34 пойгоҳи обкашӣ шодоб гардонида мешавад, ки имрӯзҳо мутахассисони Идораи давлатии беҳдошти замин ва обёрии ноҳия дар ин самт корҳои таъмириро идома дода, барои мавсими нави кишту кор омодагӣ мегиранд.
Манбаъ: АМИТ «Ховар»
Нет комментариев