Паҳлавони маъруфи тоҷик Комроншоҳи Устопириён, ки барои бори аввал дар Бозиҳои олимпӣ иштирок мекунад, дар Олимпиадаи Рио-2016 дар Бразилия дар мусобиқоти ҷудо барои медал мубориза хоҳад бурд. Ӯ дар вазни то 90 кило рӯзи 10 август вориди рақобат мешавад.
Ин гуштигири тоҷик, ки ҳоло дар Деҳаи олимпӣ ба сар мебарад, ба Олимпиада омодагӣ дорад. Комроншоҳи Устопириён гуфт, ҳар рӯз ду бор тамрин мекунад. «Субҳ дар толори варзишӣ ба тарбияти бадан машғул шуда, баъдан дар толори гуштӣ рӯи татами ё гилем таҳти назорати мураббиён Владимир Елчанинов ва Усто Устопиров машқ мекунам,» — афзуд ӯ.
Комроншоҳи Устопириён, ки бо Радиои Озодӣ суҳбати ихтисосӣ мекард, гуфт, як ҳафта боз дар шаҳри Рио-де-Жанейро қарор дорад ва аз ин пеш тӯли 45 рӯз дар Хуҷанд ва ноҳияи Шаҳристони вилояти Суғд омодагӣ дидааст. «Дар ин ҷо он усулҳоеро, ки аз бар карда будам, такрор менамоям. Бештар ба омодагии рӯҳӣ таваҷҷуҳ мекунам, инчунин, вазни худро коҳиш медиҳам. Мураббиён хатоҳоямро мегӯянд ва ман мекӯшам, ки иштибоҳҳоро ислоҳ намоям. Умуман, ба мусобиқот хуб омодагӣ мебинам,” – гуфт ӯ.
Комроншоҳ мегӯяд, рӯзи 5 август қуръакашӣ дар риштаи ҷудо барпо мегардад ва дар вазни ӯ 35 нафар рақобат мекунанд. Вай онҳоро хуб мешиносад, бо бархе аз онҳо борҳо қувваозмоӣ кардааст. Баъди он ки рақибони паҳлавонони тоҷик маълум шуданд, Комроншоҳу Муҳаммадмурод Абдураҳмонов бар асоси нақшаи нав муқобили ҳар яки онҳо сару кор мегиранд.
Паҳлавони тоҷик аз шароити тамрин ва зисташ дар Деҳаи олимпӣ изҳори қаноат карда ва гуфт, ки ҳеҷ камбуд надорад. Дар паҳлӯяш будани падару бародару мураббиаш ӯро рӯҳбаланд мекунад.
Воқеан, падари Комроншоҳ – Усто Устопириён соли 2010 дар мулоқоти варзишгарон бо раисиҷумҳури Тоҷикистон Эмомалӣ Раҳмон ваъда дода буд, ки фарзандаш дар Олимпиадаи Бразилия медали тилло ба даст хоҳад овард. “Падарам ба ман гуфтанд, ки агар соҳиби медали олимпӣ шавӣ, туро баъди бозгашт ба Ватан хонадор мекунам. Умедворам, ба Тоҷикистон бо ҷоиза бармегардам ва ин тӯҳфае мешавад ба ҷашни 25-солагии Истиқлоли давлатии Тоҷикистони азизи мо,” — иброз дошт Комроншоҳи Устопириён.
Ба назари мутахассисони ҷудо Комроншоҳ, ки дар рейтинги ҷаҳонӣ дар байни даҳ ҷудочии беҳтарини дунё ҷойгир аст, имкони ба даст овардани ҷоизаи Бозиҳоро дорад.
Бозиҳои XXXI тобистонаи олимпӣ дар шаҳри Рио-де-Жанейрои Бразилия аз 5 то 21 август барпо мегарданд. Дар назар аст, ки дар ин Бозиҳо беш аз 10 ҳазор варзишгар аз 206 кишвар иштирок мекунанд. Бояд тазаккур дод варзишгарони тоҷик дар Бозиҳои тобистонаи олимпӣ дар ҳайати дастаи мунтахаби Тоҷикистони соҳибистиқлол сар аз соли 1996 ширкат меварзанд. Ба ин тартиб, барои шашумин бор аст, ки Тоҷикистонро дар Бозиҳои олимпӣ беҳтарин варзишгарони кишвар намояндагӣ мекунанд.
КОМРОНШОҲИ УСТОПИРИЁН
7 январи соли 1993 дар ноҳияи Кӯҳистони Мастчоҳи вилояти Суғд таваллуд шудааст.
Гуштии дзюдо, вазни то 90 кг
Факултаи тарбияи ҷисмонии Донишгоҳи давлатии Хуҷандро соли 2015-ум хатм кардааст.
Аз соли 2012-ум ба дзюдо машғул аст. Аввалин мураббиаш падараш Усто Устопиров ва баъдан бародараш Фаридун Устопиров мебошанд. Феълан бо раҳбарии Владимир Николаевич Елчанинов тамрин мекунад.
Устоди дараҷаи байналмилалист.
Дар Ҷоми Аврупо соли 2013-ум дар Киев (Украина) ҷойи аввал, дар Ҷоми Владимир Путин (2013) дар Хасавюрт (Доғистон) ҷойи сеюм, дар Гран-прии Алматӣ (Қазоқистон, 2013) ҷойи сеюм, дар Гран-прии Тошканд (Узбакистон, 2013) ҷойи сеюм, дар Ҷоми Осиё дар Тайван (2014) ҷойи дуюм, дар Бозиҳои XVII осиёӣ дар Инчон (Кореяи Ҷанубӣ, 2014) ҷойи панҷум, дар Гран-прии Остона (Қазоқистон, 2014) ҷойи аввал, дар чемпионати Осиё дар Кувайт (2015) ҷойи сеюм, дар Ҷоми Осиё дар Тайван (2015) ҷойи дуюм, дар чемпионати ҷаҳон дар Остона (Қазоқистон, 2015) ҷойи панҷум, дар Гран-прии Тошканд (Узбакистон, 2015) ҷойи дуюмро ишғол кардааст.
Комроншоҳ 16 апрели соли 2016-ум дар чемпионати Осиё дар Тошканд дар вазни то 90 кг медали тилло ба даст овард. Бояд тазаккур дод, Комроншоҳи Устопириён нахустин намояндаи Тоҷикистон аст, ки дар таърихи дзюдои тоҷик ба унвони қаҳрамони Осиё соҳиб гаштааст. Ӯ баъди гурзандози машҳур Дилшод Назаров дувумин варзишгари Тоҷикистон аст, ки ба ҳаққи ширкат дар Бозиҳои тобистонаи олимпии соли 2016 дар Рио-де-Жанейрои Бразилия мушарраф шудааст ва аввалин бор дар Олимпиада ширкат меварзад.
Ғолибу ҷоизадори бисёркаратаи мусобиқоти байналмилалист.
Бар асоси рейтинг ё феҳристи охирини ҷаҳониву олимпӣ, ки дар сомонаи Федератсияи байналмилалии ҷудо (IJF) нашр шудааст, Комроншоҳи Устопириён дар байни 278 ҷудочии ҷаҳон бо 1292 имтиёз дар мақоми 10-ум ва дар рейтинги олимпӣ дар мақоми нӯҳум қарор дорад. Вай ба таври мустақим барои ширкат дар Олимпиадаи Рио-2016 роҳ ёфтааст.
Муҷаррад аст.
Манбаъ: www.ozodi.org
Нет комментариев