Аҳрор Мустафоқулов, муҳоҷири тоҷик дар Москва, дар бозии лотерея бурд намуд. Аммо маблағи бурдро ҳамоно гирифта натавонист. Баръакс, ӯро тақрибан як моҳ дар маркази махсуси нигаҳдорӣ ҷойгир карда, сипас аз кишвар хориҷ ва ба ватанаш фиристоданд.
Шарикони «Открытая Азия онлайн» — мухбирони гурўҳи медиавии ASIA Plus — бо Аҳрор дар деҳааш, воқеъ дар Турсунзода вохӯрданд.
Ба ғалабаи худ дар бозии лоторея ба маблағи 105 ҳазор рубли русӣ, падари се фарзанд ва муҳоҷир бо таҷрибаи аввалин боварӣ надошт, якчанд маротиба паёмаки SMS-ро, ки дар он хабари хуш дода шудааст, боздид намуд. Ҳоло Аҳрор иқрор мешавад, ки ба ин маблағ — тахминан 1,7 ҳазор доллари амрикоӣ — дар деҳааш хонаеро бунёд карда наметавонад, аммо ҳадди аққал метавонист барои сохтмон хиштҳояшро харидорӣ намояд.
Дар он рӯзе, ки мехост маблағи бурдро гирад, ӯ ба идораи полис фаромад, ба он ҷое, ки тавре маълум карданд, на ҳама ҳуҷҷатҳояш ба тартиб буданд. Кормандони полис шиносномаашро баргардониданд, вале бино ба гуфти Аҳрор чиптаи лотерея дар дохили он набуд. Мардро дар маркази махсуси нигаҳдорӣ барои муҳоҷирон дар Сахаров ҷойгир намуданд, ки дар он ҷо вай 22 рӯз қарор дошт ва ҳангоме, ки мӯҳлати ҳабс ба итмом расид, ӯро то ба фурудгоҳ ҳамраҳӣ намуданд ва ба ҳавопаймои самти Хуҷанд шинонданд.
«Ман санад (протокол)-и боздоштро пурсидам, ки дар он рӯйхати чизҳои мусодирашудаи шахси дастгиршуда нишон дода мешавад, вале дар рӯйхат чиптаи лотерея мавҷуд набуд, — мегӯяд ҳуқуқшинос Каримҷон Ёров. — Сипас мо ба Идораи асосӣ (офис)-и лотерея муроҷиат намудем ва дар он ҷо моро дилпур карданд, ки бурди Mустафоқулов нигоҳ дошта шудааст ва ҳеҷ кас ба ғайр аз худи ӯ онро қабул карда наметавонад ва барои дастрас намудани он суратҳисоби бонкӣ зарур аст, то маблағи бурдшуда ба он интиқол дода шавад. Лекин вақте ки мо бори дигар ба идора муроҷиат намудем, фаҳмидем, ки маблағи бурдшуда аллакай гузаронида шудааст ва номи қабулкунандаро дар ширкат ошкор накарданд, вале чиптаи бурдноки лотереяро, ки аз Mустафоқулов гирифта шудааст, нишон доданд».
Дар шиносномаи ӯ мӯҳр (штамп) «Барои вайрон кардани тартибот ворид шудан ба қаламрави Русия ва хориҷ шудан аз он минбаъд манъ шудааст» аз санаи 6-уми декабр зада шудааст, вале мӯҳлаташро муайян накардаанд. Барои ба хона баргаштан, ӯ маҷбур шуд, ки аз шиносҳояш дар шаҳри Хуҷанд қарз гирад.
Aҳрор дар масофаи 60 км дуртар аз Душанбе, дар шаҳри Турсунзода – аниқтараш, дар як деҳаи хурде бо номи Сешанбе бо ҳамроҳии оилаи худ ва хешовандони сершумораш зиндагӣ мекунад.
БО ДАСТОНИ ХОЛӢ ОМАД
Aҳрор моро дар назди дарвозаи хонааш бо дучархаи кӯҳнашудае пешвоз гирифт. Дар паҳлӯяш падараш меистод ва дар атроф фарзандони хурдсолаш давутоз доштанд. Андаке нигоҳкунон мард ба назди мо омад ва салом дод. Пас аз дар синни наврасӣ ба остеомиелит гирифтор шудан, вай маъюби гурӯҳи дуюм шуд.
Дар қафои дарвозаи онҳо майдони на онқадар калон мавҷуд аст, ки дар он таҳкурсии хона ба назар мерасид. Барои идомаи сохтмон оила маблағ надорад.
Мустафоқулов шаш фарзанд дорад. Аҳрори 37-сола — фарзанди сеюми оила аст. Ҳамаи бародарон бо ҳамсар ва фарзандонашон дар як порчаи хурди ҳавлӣ зиндагӣ мекунанд. Хона кӯҳна аст, ин аз андова ва деворҳои харобшуда маълум мешавад. Дар он 24 нафар истиқомат мекунанд. Ҳар як оила дорои ҳамагӣ як хона бо 15 метри мураббаъ таъминанд, онҳо камбағалона зиндагӣ менамоянд. Ин ҷо хеле танг аст, дар бораи майдончаи рӯи ҳавлӣ бошад, ҳоҷати гап нест. Дар охири ҳавлӣ молхонаи хурде ҳаст, ки дар он ду гов бо коҳхӯрӣ машғуланд. Ин аст тамоми хоҷагии ёрирасон Мустафоқуловҳо.
«Пеш аз он ки маро ба Домодедово оварданд, ман танҳо хоҳиш кардам, ки бароям имконият диҳанд, то сумкаамро, ки дар анбори ҷойи корам буд, гирам. Вале ба ман иҷозат надоданд, дар сумка каме пули коркардаам, телефон ва тӯҳфаҳо барои кӯдаконам мавҷуд буд. Чанде пеш аз ин ҳодиса, ба хона омаданамро ба нақша гирифта будам, — мегӯяд ӯ.
Аҳрор соҳиби се фарзанд аст. Калонӣ — духтар буда, номи ӯ Нилуфар мебошад. Вай 4 сола аст. Фарзанди миёна – Иброҳим, писараки 2 сола ва се моҳ пеш кӯдаки сеюм – писараке таваллуд шуд. Ӯро Имоммаҳдӣ ном гузоштанд.
Бо воситаи телефони Aҳрор ба духтараш овардани тӯҳфаҳоро ваъда дода буд, ки ӯ бесаброна интизор буд. Вале ҳама чиз дар Маскав монд ва духтарак намефаҳмад, ки чаро падараш ба хона бо дастони холӣ баргашт. Духтарак чанд рӯз аст, ки якравӣ мекунад ва ба падараш сухан намегӯяд.
Aҳрор дар яке аз базаҳои сабзавот дар вилояти Москва ҳамчун борбардор кор мекард. Ба ӯ дар як моҳ 25 ҳазор рубл пардохт менамуданд. Ӯ мегӯяд, ки қисме аз пулҳоро ба хонааш мефиристод. Барои зиндагии худаш ба зӯр мерасид, аммо гуфт, ки дар деҳааш вай нисфи ин маблағро ҳам ба даст оварда наметавонад. «Дар ин базаи сабзавот ҳамватанони мо зиёданд, умедворам, ки яке аз онҳо ба наздикӣ сумкаамро гирифта меоварад. То ба ҳол ман ба онҳо муроҷиат накардаам, рақамҳои телефони онҳоро намедонам, зеро телефонам дар он ҷо дар сумкаам мондааст, — мегӯяд Аҳрор.
Ӯ мефаҳмад, ки вазъияти ғайриқонунӣ дар Русия дер ё зуд ба поён мерасад, аммо вай натавонист ҳуҷҷатҳоро ба таври қонунӣ ба расмият дарорад ва патент гирад, зеро ба ин кор ҳадди ақал 30 ҳазор рубл зарур аст ва ин барояш маблағи калон аст.
ДАР САХАРОВ ҲАЁТ ШИРИН НЕСТ
Дар бораи наздик 22 рӯзи гузаронидаи худ дар маркази махсуси нигаҳдории Сахаров, Аҳрор Мустафоқулов оромона гуфта наметавонад. Дар камераи нигаҳдорие, ки вай нишаста буд, боз 9 нафар буданд — 6 нафар аз Тоҷикистон, ду нафар аз Ӯзбекистон ва як нафар аз Озарбойҷон буданд. Онҳо хуб созиш менамуданд ва аксар вақт мавзӯъҳои умумиро муҳокима мекарданд.
«Аммо ба мо дуруст хӯрок намедоданд. Ман дар хӯрокхӯрӣ инҷиқ нестам, аммо бароям маълум набуд, ки шӯрбо аз чӣ тайёр карда шудааст ва ҳар рӯз ба мо аз чунин хӯрок медоданд. Он оши явғон ё худ шулдурум ва порае аз нони сиёҳ буд. Албатта, барои аз гуруснагӣ нафавтидан, мо маҷбур будем онро хӯрем. Рӯзе як бор ба берун мебароварданд. Бисёре аз муҳоҷирон намедонистанд, ки барои чӣ онҳоро дар ин ҷо нигаҳ медоранд ва чаро онҳоро берун мекунанд», — мегӯяд Аҳрор.
Ба саволи азобу шиканҷадиҳӣ вай ҷавоб дод, ки онҳо латукӯб накардаанд, гарчанде онҳо бо муҳоҷирон муоширати дуруст надоранд.
КАМБИЗОАТӢ, БЕКОРӢ, НОУМЕДӢ
Аҳрор дар давраи бачагӣ орзу мекард, ки муҳандис шавад. Ӯ хуб мехонд, бо техника бозӣ карданро дӯст медошт. Фанҳои дӯстдоштааш математика ва физика буданд. Бинобар ин, баъд аз хатми синфи 9 ҳуҷҷатҳояшро ба шӯъбаи механикии Коллеҷи металлургӣ супорид. Аммо, онро тамом накард. Пас аз се моҳи таҳсил ногаҳон ба бемории остеомиелит гирифтор шуд ва барои барқароркунии саломатӣ ва азнав роҳгардӣ, вале ин тараф бо каме чӯлоқӣ ё худ лангӣ чор сол зарур буд.
«Мо ҳамеша пули кам доштем. Ҳеҷ гуна замин барои гирифтани даромади иловагӣ надоштем. Ҳарчанд дар охири солҳои 90-ум, президент эълон кард, ки заминҳо ба сокинони деҳот барои кишти гандум ва сабзавот бо мақсади паст кардани сатҳи камбизоатӣ дода шуданд. Ба оилаи мо он вақт ҳатто як порчаи хурде ҳам нарасид, — мегӯяд сардори оила Тилакмурод Мустафоқулов.
Ин оилаи калони имрӯз, албатта, даромади ягона доранд — ин нафақапулии волидон, ки нисфи ҳаёти худро ба корхонаи алюминий бахшидаанд. Нафақапулии Тилакмурод, ки дар коргоҳ 45 сол кор кардааст, 300 сомониро ташкил медиҳад (он каме беш аз 34 доллари ИМА аст), модараш 200 сомонӣ (тақрибан 23 доллар) мегирад. Вай 35 сол ҳамчун рӯбандаву тозакунандаи минтақаи компрессорӣ кор карда буд ва ҳоло хеле бад мебинад ва мешунавад, вале ӯро ба қайди маъюбигирӣ рад карданд.
Касе ки пойгоҳи компрессориро медонад, вай мефаҳмад, ки ҳар касе дар ин сех кор кардаст, мушкилоти шунавоиро дорад. 8 соат зарур аст, ки дар назди агрегати садобаланд сарф намоӣ, ки мунтазам заводи алюминийро бо ҳавои фишурда таъмин мекунад. Мувофиқи дастурҳо, касе ки дар ин ҷо кор мекунанд, бояд ба гӯшҳояш лавозимоти садопасткунанда пӯшад, аммо мувофиқи гуфти нафақахӯр, дар коргоҳ чунин лавозимот набуд.
Бародарон ва хоҳарон Мустафоқуловҳо пул кор мекунанд, аммо онҳо даромади устувор надоранд. Ҳоло ба онҳо Аҳрор низ ҳамроҳ шудааст. Ӯ намедонад, ки дар деҳаи худ бо чӣ кор машғул шавад. Вариантҳо каманд — дар фасли тобистон сохтмони хонаҳои шахсӣ оғоз меёбад ва мард умедвор аст, ки пул кор мекунад. Дар ҳақиқат, шаш моҳи дигар бояд интизор шуд, вале оиларо чӣ гуна нигоҳ дошт, ӯ намедонад.
Мавод дар тарҷума аз матлаби сомонаи theopenasia.net омода гардид.
Нет комментариев