Ширкатҳои машғул ба истеҳсоли маводи ғизои Тоҷикистон бори нахуст дар бузургтарин намоишгоҳи маҳсулоти хӯрокворӣ, нӯшокӣ ва таҷҳизоти кишварҳои Халиҷи Форс «Gulfood – 2018» дар Маркази савдои ҷаҳонии шаҳри Дубай иштирок карданд.
Иштироки ширкатҳои Тоҷикистон дар ин намоишгоҳ ба туфайли Лоиҳаи «Тиҷоратӣ гардонидани бахши кишоварзӣ», ки бо дастгирии молиявии Бонки ҷаҳонӣ ва кумаки техникии ширкати NIRAS амалӣ мешавад, имконпазир шуд.
Дар доираи амалисозии ин лоиҳа муддати чандин моҳ бо дастгирии Палатаи савдо ва саноати Тоҷикистон (ПСС ҶТ) дар мавриди мусоидат ба иштироки 4 ширкати узви Палата дар ин намоишгоҳ корҳои омодагӣ роҳандозӣ шуданд.
Тавре аз ПСС ҶТ хабар доданд, дар гӯшаи миллии андозаи 21 метри мураббаъ ширкатҳои тоҷикистонии ҶСК «Абрикос ва К», ҶДММ «ОРО Исфара», ҶДММ «Исфара Фуд», ҶДММ «Ҳариф» (Тоҷик Продукт) маҳсулоти худро ба маърази тамошо гузоштанд.
Номгӯи маҳсулот аз хушкмева ва растаниҳои лӯбиёгӣ, лимон ва ангур иборат буд. Тамошогарон ба навъи ангури тоҷикиситонии «Майерс» таваҷҷуҳи хосса зоҳир намуданд.
Намоишгоҳи махсуси ҳамасолаи Gulfood бузургтарин дар ҷаҳон ва минтақаи Халиҷи Форсу Шарқи Наздик маҳсуб ёфта, дар он зиёда аз 5 ҳазор намоишгар аз 120 давлати дунё маводҳои ғизоиро ба намоиш мегузоранд. Аз ин намоишгоҳ беш аз 95 ҳазор нафар аз 170 кишвари дунё боздид мекунанд.
Манбаъ: Сомонаи расмии «Азия-плюс»
Нет комментариев