Санаи 17 августи соли 2017 маҷмӯи машқҳои муштараки амалиётӣ-стратегии зиддитеррористӣ, ки санаи 14 август бо ҷалби сохтору мақомоти давлативу қудратии гарнизони Суғд оғоз гардида буд, дар машқгоҳҳои низомии “Чорухдарон” бо муваффақият ба анҷом расид. Дар маросими ҷамъбастии ҷамъомади мудофиаи ҳудудӣ, машғулиятҳои омодагии сафарбарӣ ва машқҳои муштараки амалиётӣ-стратегии зиддитеррористӣ Вазири мудофиаи кишвар Шералӣ Мирзо ва Раиси вилояти Суғд Абдураҳмон Қодирӣ иштирок намуданд. Бояд гуфт, ки чорабинии мазкур таҳти роҳбарии Ситоди генералии Қувваҳои Мусаллаҳи Ҷумҳурии Тоҷикистон дар асоси супориши Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва тибқи Нақшаи муштараки маҷмӯи чорабиниҳои асосии Қувваҳои Мусаллаҳ баргузор шуд. Ҷамъомади мудофиаи ҳудудӣ, машғулиятҳои омодагии сафарбарӣ ва машқҳои муштараки амалиётӣ-стратегии зиддитеррористӣ дар 4 марҳила дар машқгоҳҳои низомии “Чорухдаррон” ва “Нурафшон” ба таври назариявию амалӣ ҷараён гирифт. Зимни баргузории ин чорабинӣ захираҳои эҳтиётии даъватшавандагони шаҳру ноҳияҳо ва шаҳрвандони дар қайди комиссариатҳои ҳарбӣ буда истифода гардид. Дар ҷамъомади мудофиаи ҳудудӣ раисони шаҳру ноҳияҳои вилояти Суғд ва масъулини тамоми сохторҳои қудратӣ ширкат намуда, онҳо ба машғулиятҳои омодагии сафарбарӣ, сафороиву қадамзанӣ, тартиби дурусти ҳуҷҷатгузорӣ, тирпарронӣ аз техникаҳои вазнини зиреҳпӯши ҷангӣ, силоҳу муҳимоти сабуки ҳарбӣ ҷалб карда шуданд. Дар машқҳои муштараки амалиётӣ-стратегии зиддитеррористӣ, аслиҳаи мухталифи оташнишон, 10 адад авиатсияи ҷангӣ, наздики 200 адад техникаҳои зиреҳпӯши ҳарбӣ, 70 адад техникаҳои артиллерӣ ва зиёда аз 450 адад техникаҳои автомобилӣ истифода гардиданд.
Манбаъ: сомонаи расмии МИҲД-и вилояти Суғд
Нет комментариев