Бо иштироки Раиси вилояти Суғд Абдураҳмон Қодирӣ, муовинони Раиси вилоят, раисони шаҳру ноҳияҳо, роҳбарони корхонаҳои пахтатозакунӣ, корхонаҳои равғанкашӣ ва дигар шахсони масъул ҷаласаи корӣ баргузор гардид.
Нахуст дар назди ҳозирин вобаста ба масъалаҳои кишт, парвариш, пахтачинӣ, коркард, интихоби тухмиҳои хушсифат муовини Раиси вилоят Сулаймон Зиёев гузориш дод. Тавре иттилоъ дода шуд соли ҷорӣ кишоварзони вилоят дар майдони наздик 43 ҳазор гектар пунбадона кишт намудаанд, ки аз ин 64,7 фоизашро навъи тухмиҳои хушсифати хориҷӣ ташкил медиҳад.
Таҳлилҳо нишон медиҳанд, ки корхонаҳои пахтатозакунии вилоят соли 2014 аз ҳисоби ҳосили пахта ба миқдори 97 ҳазору 295 тонна пахтаи хом захира ва коркард намуда, аз он 34 ҳазору 516 тонна нахи соф ба даст овардаанд, ки ин 35,7 фоизро ташкил медиҳад. Ба гуфти муовини Раиси вилоят соли 2014 баромади миёнаи чигит дар вилоят нисбати меъёри муқарраргардида 0,3 фоиз кам гардидааст, ки ин асосан аз ҳисоби корхонаҳои пахтатозакунии ҶДММ Муъмин инвест коттони ноҳияи Ашт, бахши Зафарободии ҶСП Деҳқон, ҶДММ Эрудит, ҶДММ Довуди Зафарободи ноҳияи Зафаробод, ҶС Ҳабиби шаҳри Конибодом мебошад. Дар ин корхонаҳо пахта бо намнокии баланд ворид гардидааст, ки дар натиҷаи коркард намудани пахтаҳои навъҳои сеюм ва чорум баромади тибит кам гардида, нишондоди зағолакҳои истеҳсолӣ аз меъёри муқарраргардида 0, 2 фоиз зиёд мебошад.
Бояд гуфт, ки бо назардошти нархи нахи пахта дар бозори ҷаҳонӣ ва талабот ба ин ашёи хоми саноатӣ соли 2014 бо ташаббус ва дастгирии Раиси вилоят аз шаҳру ноҳияҳои вилояти Хатлон навъҳои тухмиҳои хориҷии хушсифат ва серҳосили пахта оварда шуда, дар заминҳои вилоят кишт гардиданд. Ҳамчунин аз ҷумҳурии халқии Хитой ба хоҷагиҳои пахтакори вилоят ба миқдори умумии 46 тонна навъи тухмии Синюза-39 дастрас карда шуд. Натиҷаи кишти тухмиҳои хориҷии пахта дар соли 2014 нишон дод, ки сатҳи ҳосилнокӣ аз ин намуди тухмиҳо нисбат ба тухмиҳои маҳаллӣ баромади ҳақиқии он 36, 7 то 40, 7-фоизро ташкил медиҳад.
Дар мавсими коркарди пахтаи ҳосили 2014 корхонаҳои пахтатозакунӣ аз қабили ҶДММ Рахшонаи ноҳияи Ашт, ҶДММ Фаронак, Зафаробод инвести ноҳияи Зафаробод, ҶДММ Музаффари ноҳияи Мастчоҳ, ҶДММ Юсуф саркори ноҳияи Бобоҷон Ғафуров, ҶС Сидней-Хуҷанди шаҳри Қайроққум ва ғайра фаъолияти пурсамар намудаанд. Аз ҷумла дар ин корхонаҳо баромади ҳақиқии нахи софи навъҳои хориҷии пахта 36 то 40,9 фоизро ташкил медиҳад. Вале қайд кардан ҷоиз аст, ки дар корхонаҳои алоҳидаи вилоят, аз ҷумла дар ҶДММ Довуди Зафаробод, ҶДММ Солеҳи ноҳияи Мастчоҳ, ҶМ Деҳқони ноҳияи Спитамен, ҶДММ Эрудити ноҳияи Зафаробод ва ҶСШК ба номи А. Ҷумъаев баромади миёнаи нах нисбат ба ҳисоби миёнаи вилоят паст мебошад. Иттилоъ дода шуд, ки айни замон дар вилоят 33 адад корхонаҳои коркарди пахта мавҷуд буда, иқтидори коркарди онҳо дар як сол зиёда аз 400-450 ҳазор тоннаро ташкил медиҳад. Аз миқдори зикргардидаи корхонаҳо 12 адади онҳо бо таҷҳизоти муосиру ҳозиразамони истеҳсолӣ таъмин мебошанд. Аз руи ҳисобҳо иқтидори солонаи корхонаҳои равғанкашӣ бошад, 100 ҳазор тонна зиёд пунбадона мебошад. Бояд гуфт, ки аксари ин корхонаҳо ба таври мавсимӣ аз 3 то 6 моҳ фаъолият мебаранд, ки боиси бекор мондани сокинон мегардад.
Тибқи маълумоти оморӣ дар қаламрави вилоят айни замон 34 корхонаи истеҳсоли растанӣ ба қайд гирифта шудаанд. Дар чунин корхонаҳои фаъолиятбаранда дар давоми 8 моҳи сипаришуда 9548 тонна чигит, 1100 тонна офтобпараст, дар маҷмуъ 11,4 ҳазор тонна ашёи хом коркард карда шудааст. Дар натиҷаи чунин коркард 1666 тонна равғани софи растанӣ истеҳсол карда шудааст.
Раиси вилоят масъалаҳои мазкурро ба таври дақиқ таҳлилу баррасӣ намуда аз ҷумла зикр дошт, ки пахта яке аз ашёи хоми асосии саноатӣ ва содиротӣ дар мамлакат мебошад. Иттилоъ дода шуд, ки бояд кишти тухмиҳои хориҷии пахта, ки сатҳу сифати ҳосилнокии хубро доро мебошанд, пурра дар ҳамаи хоҷагиҳои пахтакор ҷорӣ карда шаванд. Тавре қайд гардид, аксари хоҷагиҳое, ки навъҳои тухмиҳои хориҷии пахтаро кишт намудаанд ҳосилнокии хубро ба даст овардаанд. Масалан, хоҷагиҳое ба қайд гирифта шудаанд, ки бо кишт намудани навъҳои тухмиҳои хориҷӣ сатҳи ҳосилнокиро то ба 69 сентнер аз ҳар як гектар расонидаанд.
Дар машварат гуфта шуд, ки ҳаққи чиниши пахта соли ҷорӣ на камтар аз 30 дирам ба роҳ монда шуда, чиниши пахта бо истифодаи қувваи кории аъзоёни хоҷагӣ сурат гирад. Ғайр аз ин бояд дар ҳамаи шаҳру ноҳияҳо марказҳои хизматрасонии техникӣ зиёд гардонида шуда, сатҳи хизматрасони бояд боло бурда шавад. Раиси вилоят таъкид дошт, ки фуруши пахта дар кишвар озод буда, хар як хоҷагидор метавонад дар дохили кишвар бо ёфтани харидорон маҳсулоти худро ба фуруш барорад. Аммо дар сурати ба хориҷи кишвар ба фуруш баровардан 10 фоиз аз фоида андоз супорида мешавад.
Дар фарҷоми ҷаласа аз ҷониби Раиси вилоят таъкид гардид, ки дар анҷоми чиниши пахта дар соли ҷорӣ беҳтарин чинакчиён, корхонахэҳои коркарди пахта ва корхонаҳои равғанкашӣ бо сипосномаҳо ва ифтихорномаҳо қадрдонӣ мегарданд.
Дар ин бора http://sugd.tj/index.php/tj/navid/5272-mashvarat-kori хабар медиҳад.
Нет комментариев