Дар маҷлисгоҳи Муассисаи давлатии «Боғи миллии Ваҳдат» бо иштироки муовинони раисони шаҳру ноҳияҳо, раисони ҷамоатҳои деҳот ва олимону коршиносони соҳаи кишоварзӣ дар мавзӯи «Хусусиятҳои парвариши картошкаи барвақтӣ» семинар-машварати вилоятӣ доир шуд.
Раиси вилояти Суғд Раҷаббой Аҳмадзода зимни суханронии худ дар семинар-машварати вилоятӣ иброз дошт, ки картошкапарварӣ яке аз соҳаҳои асосӣ ва афзалиятнок ба ҳисоб рафта, ҷиҳати таъмини амнияти озуқаворӣ, афзун гардонидани имкониятҳои содиротии мамлакат ва бо кори доимӣ таъмин намудани кишоварзон нақши муҳим дорад.
Таъкид гардид, ки таваҷҷӯҳи Ҳукумати мамлакат нисбати рушди устувори соҳа, афзун намудани ҳаҷми истеҳсоли хушсифату содиротивазкунанда ва рақобатпазирӣ ватанӣ басо калон буда, қабул гардидани Барномаи давлатии рушди соҳаи картошкапарварӣ дар Ҷумҳурии Тоҷикистон барои солҳои 2012-2016 ба рушди минбаъдаи устувори соҳаи картошкапарварӣ заминаи мустаҳкам гузошт.
Дар асоси дастуру супоришҳои Ҳукумати Ҷумҳурии Тоҷикистон бо мақсади танзими нархи картошка дар бозорҳои истеъмолӣ ва афзун намудани иқтидори содироти маҳсулоти кишоварзӣ, дар мавсими соли 2018 нисбати васеъ намудани масоҳати кишти картошка дар хоҷагиҳои кишоварзии вилоят таваҷҷӯҳи хоса зоҳир гардида, нақшаи кишти картошка нисбати соли гузашта зиёд карда шуда, ба 14641 гектар расонида шуд.
Дар натиҷа, афзуншавии ҳаҷми истеҳсоли картошка таъмин гашта, ба ҳолати 1 январи соли ҷорӣ дар ҳамаи шаклҳои хоҷагидории вилоят 415 962 тонна картошка истеҳсол гардид, ки нисбати ҳамин давраи соли гузашта 91098 тонна зиёд мебошад.
Бо мақсади афзун намудани ҳаҷми истеҳсоли маҳсулоти воридотивазкунандаю тамоюли содиротидошта тибқи нишондоди сохтори кишт имсол танҳо дар хоҷагиҳои кишоварзии вилоят гузаронидани 16050 гектар кишти картошка пешбинӣ карда шудааст, ки аз кишти соли 2018-ум 1409 гектар зиёд мебошад. Аз ҷумла дурнамои картошкаи барвақтӣ 1500 гектар пешбинӣ карда шудааст.
Раиси вилоят ҳамзамон бо таҳлили вазъи соҳа ҷиҳати ислоҳи камбудию норасогиҳои ҷойдошта, захираи тухмиҳои серҳосилу минтақабоб, афзун намудани ҳаҷми истеҳсоли картошка, ғанӣ гардонидани бозорҳои истеъмолӣ ва дар ин замина ба содирот баровардани он ба масъулин тавсияҳои судманд дод.
Дар семинар-машварати вилоятӣ инчунин олимону мутахассисони соҳа оид ба навъҳои минтақабобу хушсифат, меъёрҳои агротехникӣ, риояи муҳлатҳои оптималӣ, қоидаҳои агротехникии парвариш ва самаранокии иқтисодии соҳа маълумот ва тавсияҳои худро пешниҳод намуданд.
Манбаъ: Хадамоти матбуоти Раиси вилояти Суғд
Нет комментариев