Аз ин ба баъд хизматчиёни давлатӣ ҳангоми ба кор қабул шудан, дар ҷамъи роҳбарият ва ҳайати кормандони мақомот назди Парчами давлатӣ истода, даст болои Конститутсияи Ҷумҳурии Тоҷикистон мегузоранд ва савганд ёд мекунанд. Дар иртибот ба ин 3 май вакилони палатаи поёнии Парлумони Тоҷикистон ба Қонуни Ҷумҳурии Тоҷикистон «Дар бораи хизмати давлатӣ» тағйиру иловаҳо ворид намуданд. Ин тадбир бо мақсади баланд бардоштани масъулияти хизматчиёни давлатӣ, такмили фаъолияти мақомоти давлатӣ, интизоми давлатӣ ва хизмати давлатӣ андешида шудааст. Савганд ёд кардан ба номи халқу Ватан яке аз рункҳои фарҳанги давлатдорӣ буда, он ҳатто дар даврони давлатдории ниёгонамон роиҷ буд. Савганд ёд кардан шахсро водор месозад, ки ба ватану миллат содиқ бимонад, бо виҷдону имони комил ва иродаи матин зимни фаъолият дар мақомоти давлатӣ дар таҳкими пояҳои давлатдорӣ ва хизмат ба миллат ва Ватан, ки шараф аст, қадамҳои устувор гузорад.
Манбаъ: www.khovar.tj
Нет комментариев