Дар маҷлисгоҳи мақомоти иҷроияи ҳокимияти давлатии вилоят таҳти раёсати Раиси вилояти Суғд Раҷаббой Аҳмадзода оид ба ҷамъбасти нишондиҳандаҳои иқтисодиву иҷтимоӣ дар 8 моҳи соли равон ҷаласаи корӣ баргузор шуд.
Дар кори ҷаласа муовини якуми Раиси вилоят, муовинони Раиси вилоят, раисони шаҳру навоҳӣ, роҳбарони ташкилоту идораҳои вилоятӣ ва дигар шахсони масъул ҳузур доштанд.
Муовини якуми Раиси вилоят Рустам Раҳматзода зимни пешниҳоди ҳисобот таъкид дошт, ки дар давраи сипаришудаи соли ҷорӣ ҷиҳати амалӣ намудани дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вилоят корҳои назаррас анҷом дода шудааст. Таъкид гардид, ки ба истиқболи 30-солагии Истиқлолияти давлатии Ҷумҳурии Тоҷикистон дар шаҳру ноҳияҳои вилоят корҳои ободониву созандагӣ вусъати тоза пайдо намудааст ва дар ин раванд бунёду сохтмони майдончаҳои варзишӣ низ муташаккилона идома дорад.
Раиси вилоят Раҷаббой Аҳмадзода таваҷҷуҳи масъулинро ба муаммову мушкилоти мавҷудаи соҳаи варзиш, тезонидани корҳои сохтмонӣ дар иншооти варзишӣ ва ҷалби кӯдакону наврасон ба чорабиниҳои варзишиву фарҳангӣ ҷалб намуд.
Доир ба омодагии соҳаҳои тандурустиву маориф ба давраи тирамоҳу зимистони солҳои 2018-2019, таъмини хонандагони муассисаҳои таълимӣ бо либоси ягонаи мактабӣ, рафти таъмиру навсозии мактабҳои садамавӣ ва дигар масъалаҳо ҳисоботи муовини Раиси вилоят Назира Ғаффорӣ шунида шуд. Бино ба иттилои номбурда барои таҳким бахшидани пояи моддиву техникии муассисаҳои таълимӣ аз ҷониби мақомоти иҷроияи ҳокимияти давлатии вилоят тадбирҳои судманд амалӣ гардиданд. Аз 46 мактаби садамавӣ дар 13 адади он корҳои навсозӣ оғоз гардида, дар ин давра хонандагони муассисаҳои таълимии вилоят бо либоси ягонаи мактабӣ пурра таъмин шудаанд.
Раиси вилоят Раҷаббой Аҳмадзода ба масъулин дастур дод, ки то ҷашни 30-солагии Истиқлолияти давлатӣ мушкилоти мактабҳои садамавӣ, норасогии синфхонаҳо ва танқисии мактабҳо бо кадрҳои баландихтисос ба пуррагӣ бартараф карда шавад. То ба имрӯз нақшаи захиракунии маводи сӯхт, аз ҷумла ангишту ҳезум дар соҳаи маориф 76 фоизро ташкил медиҳад ва барои иҷрои нақша муҳлат муайян карда шуд. Дар соҳаи тандурустӣ низ дар баробари дастовардҳо мушкилоти зиёд мавҷуд аст, ки бартараф намудани он бар нафъи кор хоҳад буд. Таъмини нақшаи захираи маводи сӯхт барои давраи сармо, ки то ба имрӯз 93 дарсад иҷро шудааст, аз масъалаҳои ҳалталаб дониста шуд. Ба масъулини соҳа зарур аст, ки ҷиҳати самаранок фаъолият намудани беморхонаҳо, муассисаҳои тибби хусусӣ, пешгирӣ намудани воридоти дорувории бесифат, риояи ҳолати санитарӣ тадбирҳои зарурӣ андешанд.
Фаъолияти соҳаи фарҳанг низ дар ҷаласа таҳлилу баррасӣ гардида, барои ҷоннок намудани кори театрҳо, таъмини ансамблҳои рақсӣ бо ҳунармандон, кашфи чеҳраҳои нав ва истеъдодҳои нодир супоришҳо дода шуд.
Дар ҷаласа инчунин ҳисоботи муовини Раиси вилоят Анвар Яъқубӣ оид ба вазъи иқтисодиёти вилоят ва ҳисоботи муовини Раиси вилоят Ориф Хоҷазода оид ба вазъи соҳаи кишоварзӣ шунида шуд ва сипас Раиси вилоят ҷиҳати ҳалли мушкилоти мавҷудаи соҳаи саноат, истифодаи иқтидорҳои мавҷудаи Минтақаи озоди иқтисодии “Суғд”, назорат ва ба тартиб даровардани хизматрасонии ошхонаву тарабхонаҳо, меҳмонхонаҳо, захираи хошоки дурушти чорво, самаранок истифода намудани гармхонаву сардхонаҳо, омӯзиши ҳолати кунунии корхонаҳои коркарди пахта ва беталаф ҷамъ намудани ҳосили пахта, рушди соҳаи занбӯри асалпарварӣ дар назди шахсони масъул вазифаҳои мушаххас гузошт.
Раиси вилоят дар поёни ҷаласаи ҷамъбастӣ бо ёдоварӣ аз камбудиву мушкилоти соҳаҳои гуногун ва роҳҳои бартарафсозии он иброз дошт, ки ҳар як шахси масъул бояд софдилона меҳнат намуда, барои пешрафту шукуфоии Ватани соҳибистиқлоламон саҳми арзанда гузорад.
Манбаъ: Хадамоти матбуоти Раиси вилояти Суғд
Нет комментариев