Дар Донишгоҳи давлатии ҳуқуқ, бизнес ва сиёсати Тоҷикистон конфронси ҷумҳуриявии илмӣ-методӣ таҳти унвони «Нақши технологияҳои информатсионӣ дар баланд бардоштани сифати таълим» баргузор гардид.
Дар кори конфронс олимону мутаххассисони соҳавӣ, намояндагони муассисаҳои таҳсилоти олии кишвар ва ташкилоту ширкатҳои бонуфуз ширкат доштанд.
Конфронсро ректори донишгоҳ Муъмин Шарифзода ифтитоҳ намуда, зикр дошт, ки тараққиёти илму техникаҳои муосир водор месозад, ки ҳамаи ҷабҳаҳои фаъолият, бахусус, идоракунии раванди таълим дар муассисаҳои таҳсилоти олӣ бо истифодаи технологияҳои иттилоотӣ, ки талаботи даврони муосир аст, мувофиқ гардонида шавад. Зеро, истифодаи самараноки васоити муосири техникӣ дар таъмини сифати таҳсилот, воридшавии Ҷумҳурии Тоҷикистон ба фазои ягонаи таҳсилоти ҷаҳонӣ ва татбиқи намудҳои гуногуни таҳсилот – кредитӣ ва фосилавӣ нақши муассир дорад.
Сипас, як қатор олимону устодон оид ба нақши технологияҳои информатсионӣ дар самти беҳтар намудани сифати таълим суханронӣ намуданд.
Нимаи дуюми рўз кори конфронси ҷумҳуриявии илмӣ-методӣ таҳти унвони «Нақши технологияҳои информатсионӣ дар баланд бардоштани сифати таълим” бо пешниҳод ва баррасии беш аз 100 мақола дар чор бахш идома ёфт. Дар маърўзаҳо перомуни роҳҳои ташаккул ва ҳавасмандкунии донишҷӯён дар раванди таълим тавассути технологияҳои муосир, тарзи истифодабарии босамари усулҳои инноватсионӣ дар мактабҳои олӣ, аҳамият ва муҳимияти технологияи инноватсионӣ дар раванди таълим, коркарди технологияи нави қобилияти касбии омӯзгори навовар, муаммоҳо ва рушди самтҳои инноватсионӣ дар системаи маориф, низоми босамари тайёр кардани мутахассисон ба воситаи технологияҳои муосир, тақвияти истифодаи технологияи иттилоотии муосир дар раванди идоракунӣ, зарурияти татбиқи технологияҳои инноватсионии таълимӣ дар системаи маориф ва ғайра сухан рафт.
Бо муайян намудан ва пешниҳоди омилҳои муҳими омода кардани мутахассисони баландихтисос бо истифодаи технологияҳои инноватсионӣ кори конференсия ба анҷом расид.
Манбаъ: Хадамоти матбуоти Раиси вилояти Суғд
Нет комментариев