Барои нахустин бор маҳсулоти ҳунарҳои дастии Тоҷикистон дар намоишгоҳи маъруфи байналмилалии молҳои истеъмолӣ — «Ambiente», дар шаҳри Франкфурти Олмон аз 13-ум то 17-уми феврал ба намоиш гузошта мешавад. Тавре ки аз Маркази тиҷорати байналмилалӣ иттилоъ доданд, иттиҳоди ҳунармандони Тоҷикистон ва ширкати “Умед” бо мусоидати МТБ  Тоҷикистонро дар муҳимтарин намоишгоҳи тиҷоратии молҳои истеъмолӣ дар ҷаҳон намояндагӣ мекунанд. Ин сафар аз ҷониби Ҳукумати Швейтсария дар чаҳорчӯбаи «Барномаи ҳамкориҳои тиҷоратӣ дар Тоҷикистон» маблағгузорӣ мешавад. Ҳамасола дар намоишгоҳи «Ambiente» 4700 ширкат қариб аз 90 кишвар ва тақрибан 145 ҳазор меҳмон аз 160 кишвари ҷаҳон иштирок мекунад. Дар ҷараёни он чандин чорабиниҳои дигар гузаронида мешаванд, ки дар онҳо равандҳои тозатарини соҳаи саноат ба маъраз гузошта шуда, ҳамчунин имконияти барқарор кардани тамосҳои нав фароҳам меояд. Ширкаткунандагони намоишгоҳ аз навовариҳои корбурд дар мӯди тарроҳӣ ва равандҳои мӯдсозии бозор огоҳ мешаванд. Дар ин бора khovar.tj хабар медиҳад.