14 –уми октябр дастаи мунтахаби Тоҷикистон барои ҷойи сеюми мусобиқаи байналмилалии «King’s Cup-2024» дар Тайланд бо тими миллии Филиппин рақобат кард.
Вохӯрӣ дар варзишгоҳи Тинсуланондаи шаҳри Сонгхкла баргузор шуда, бо ҳисоби 0 бар 3 ба фоидаи тими Филиппин анҷом ёфт. Голҳоро аз ҳайати Филиппин — Геррит Холтманн, 47’ , Ҷефферсон Давид Табинас, 58’ ва Зико Бэйли 62’ ба самар расониданд.
Қобили зикр аст, ки тими миллии Тоҷикистон дар даври нимниҳоии мусобиқаи мазкур аз дастаи Сурия бо ҳисоби минималии 1 бар 0 ноком шуда буд.
Сабаби бохтҳои пайи ҳами тими миллии Тоҷикистонро дар саҳифаи расмии хеш дар шабакаҳои иҷтимоӣ Федератсияи футболи Тоҷикистон чунин шарҳ додааст.
“Мунтахаби Тоҷикистон дар мусобиқаи «King’s Cup-2024» дар Тайланд дар ҳайати асосӣ баромад накард. Як қатор бозигарони калидии тими миллӣ бо сабабҳои гуногун дар ҳайати даста набуданд. Ҳамзамон ситоди мураббиён ба сафи мунтахаби кишвар як идда бозигарони ҷавонро ҷалб кард, ки моҳи сентябри соли оянда дар марҳилаи интихобии Ҷоми Осиё-2026 байни дастаҳои олимпии то 23-сола ширкат менамоянд.
Машғулиятҳои дастаҷамъии навбатии тими миллии Тоҷикистон дар рӯзҳои ФИФА-и моҳи ноябр баргузор мешавад. Дастаи мо дар майдони худ ду бозии дӯстона доир менамояд. Дар бораи ҳарифон дертар иттилоъ хоҳем дод.”
Ёдовар мешавем, ки дастаи Тоҷикистон моҳе қабл дар мусобиқаи Ҷоми Мердека 2024 бар тими Филиппин дар силсилазарбаҳои пеналтӣ зафар ёфта, барандаи медали биринҷӣ шуда буд. Дар мусобиқаи «King’s Cup-2024» 2 сол пеш тими миллии Тоҷикистон ғолиб омада буд.
Манбаъ: Варзиш-ТВ
Нет комментариев