Размовари варзидаи рус дар риштаи ММА Ҳабиб Нурмагомедов дар арафаи Соли Нав дар саҳифаи “Инстаграм”–аш навишт, ки ӯ орзуи даҳҳо мухлисони худро амалӣ хоҳад кард. Ҳабиб ба истифодабарандагони ин сомонаи иҷтимоӣ пешниҳод кард, ки онҳо дар саҳифаи худ номае бо орзуҳо ва ё тӯҳфаҳо навишта, дар он хештеги “#ПисьмоХабибу” (Нома ба Ҳабиб) гузоранд. Ба варзишгар бештар аз 14 ҳазор нафар нома навиштанд, ки дар қатори онҳо шумораи зиёди ҳамватанони мо низ буданд. Мутаасифона байни онҳое, ки бахташон омад кард ва Ҳабиб ба номаҳои онҳо ҷавоб гуфт, тоҷикони мо қарор нагирифтанд. Инҷо мо якчанд номаи ҷавонони тоҷикро ҷамъоварӣ кардем:
“Ман намедонам, ту ба ман посух медиҳӣ ё не, ман _____, аз шаҳри Душанбе ҳастам. Ман гурусна ва бемор нестам, ҳамааш хуб аст. Ман ҳоло ин номаро бо ашки чашм навишта истодаам, ман дар ҳаёт шикаст хӯрдам, ман кӯшиш мекардам, ки ба варзиш машғул шавам, аммо тамринҳои ман як моҳ давом накарданд. Аз хӯрдӣ ба футбол шавқ доштам, мехостам дарвозабон шавам, аммо дар ин ҷода ҳам корам барор нагирифт. Ба ман каме дилгармӣ намерасад, илтимос ба ман 1 рӯз ҷудо кун, танҳо бо ман бош, сӯҳбат кунем!”
Номаи “бародарон – донишҷӯён” ба Ҳабиб:
“Ассалому алейкум. Мо ду бародарон аз Тоҷикистон – Ҳаёт ва Шодрӯз ҳастем. Мо дар донишгоҳи техникӣ дар факултети Сохтмон ва нақлиёт таҳсил мекунем. Дер боз рақобатҳои туро тамошо мекунем ва ҳамеша разми туро бо Конор Макгрекор интизор будем ва ниҳоятан ту он аблаҳро шикаст додӣ. 6-уми октябр вақте ту бар он бадрӯй дастболо шудӣ, мо дар ҳайрат будем ва рӯзи дароз ғолибияти туро ҷашн гирифтем. Аз ту ба мо чизе бисёре лозим нест, мо танҳо мехоҳем бо ту вохӯрӣ кунем ва китоби туро бо соядастат ба даст орем. Мо донишҷӯ ҳастем ва агар ту ин китобро ба мо диҳӣ, он ба мо ҳавасмандӣ ва дилгармии зиёд мебахшад. Ва инчунин мо мехостем бо ту дар чойхона нишаста оши палав хӯрем ва як чойник чой нӯшем. Мо умед дорем, агар ту ин номаро бихонӣ ба он ҳатман ҷавоб мегӯӣ. ”
Ба ғайр аз ин тоҷикон аз Ҳабиб хоҳиш карданд, ки дар Хуҷанд толори варзишӣ кушояд, сарпӯшашро тӯҳфа кунад ва боз ба Тоҷикистон меҳмон шавад.
Манбаъ: сомонаи ТВ «Варзиш»
Нет комментариев