Озмуни «Омӯзгори соли Тоҷикистон-2017» ҷамъбаст гардид. Дар озмун панҷ нафар довталабон аз ВМКБ, вилоятҳои Суғд, Хатлон, шаҳрҳои Душанбе ва Ваҳдат аз рӯйи 7 шарт байни ҳам қувваозмоӣ намуданд. Муовини Вазири маориф ва илми Ҷумҳурии Тоҷикистон Латофат Назирӣ нахуст аз сиёсати пешгирифтаи Ҳукумати ҷумҳурӣ оид ба соҳаи маориф ёдовар шуда, аҳли маорифро бо соли нави 2018 табрик намуд ва андешаҳои хешро оид ба рафти озмуни имсола баён намуд. Сипас, раиси ҳайати ҳакамон, сардори раёсати таҳсилоти томактабӣ ва миёнаи умумӣ Абдуҷаббор Алиев озмунро ҷамъбаст намуда, тибқи хулосаи аъзои ҳайат омӯзгори муассисаи таҳсилоти миёнаи умумии №14-и ноҳияи Бобоҷон Ғафурови вилояти Суғд Раъно Икромоваро бо 1150 хол «Омӯзгори соли Тоҷикистон-2017» эълон кард. Ба ғолиб туҳфаҳои таъсиснамудаи Вазорати маориф ва илм, Кумитаи иттифоқи касабаи кормандони маориф ва илми Ҷумҳурии Тоҷикистон, аз ҷумла, мукофоти пулӣ дар ҳаҷми 4 ҳазор сомонӣ супорида шуд. Ба Моҳира Худоназарова- омӯзгори муассисаи таҳсилоти миёнаи умумии №45 шаҳри Душанбе, Модавлат Чоршанбиева- омӯзгори муассисаи таҳсилоти миёнаи умумии № 11 ноҳияи Шуғнон, Идигул Алиева- омӯзгори муассисаи таҳсилоти миёнаи умумии №19 шаҳри Ваҳдат, Шуҳрат Мирзоев- омӯзгори мактаби Президентӣ барои хонандагони болаёқати шаҳри Кӯлоб низ ҳамчун иштирокчиёни даври ниҳоии озмуни ҷумҳуриявӣ мукофотҳои хотиравии Вазорати маориф ва илми кишвар, Кумитаи иттифоқи касабаи кормандони маориф ва илм супорида шуданд. Ҳамчунин, тибқи фармоиши Вазири маориф ва илми Ҷумҳурии Тоҷикистон, Р. Икромова, М. Худоназарова, М. Чоршанбиева, И. Алиева бо нишони «Аълочии маориф ва илми Ҷумҳурии Тоҷикистон» ва Ш. Мирзоев бо Ифтихорномаи Вазорати маориф ва илм сарфароз гардонда шуданд.
Манбаъ: сомонаи расмии АМИТ «Ховар»
Нет комментариев