Раиси вилояти Суғд Раҷаббой Аҳмадзода зимни сафари корӣ ба шаҳри Исфара дар маркази шаҳр ба корҳои мумфаршкунии қитъаи роҳи Баҳор то кӯчаи Нарзӣ Ҳаитов оғоз бахшид.
Тавре ҳангоми оғози корҳои мумфаршкунӣ иттилоъ дода шуд, роҳи мазкур ба дарозии 2 км бо маблағгузории мақомоти иҷроияи ҳокимияти давлатии вилоят пурра мумфарш карда мешавад. Фармоишгари корҳо идораи сохтмони асосии вилоят буда, пудратчӣ ҶДММ «Тоҷроҳ” мебошад.
Раиси вилоят Раҷаббой Аҳмадзода дар аснои суҳбат бо сокинони маркази шаҳр таъкид кард, ки бо мақсади дар сатҳи баланд таҷлил намудани 30 – солагии Истиқлолияти давлатии Ҷумҳурии Тоҷикистон дар шаҳру ноҳияҳои вилоят корҳои ободониву созандагӣ вусъати тоза пайдо намуда, сохтмону бунёди садҳо иншооти гуногун идома дорад. Зикр гардид, ки ба истиқболи ҷашни миллӣ то соли 2021 дар вилоят беш аз 3000 иншооти гуногунсоҳа, аз ҷумла корхонаҳои саноатӣ, мактабу кӯдакистонҳо, ҳаммому кошонаи ҳусн, толору майдончаҳои варзишӣ, бунгоҳҳои тиббӣ ва амсоли ин бунёд ва мавриди истифода қарор дода мешавад.
Раҷаббой Аҳмадзода аз сокинони шаҳр даъват намуд, ки бо шукргузорӣ аз даврони осоишта ва осмони софу беғубор барои густариши корҳои созандагӣ саҳмгузор бошанд ва наврасону ҷавононро дар руҳияи худшиносиву ватандӯстӣ тарбия намоянд. Фаъолони шаҳри Исфара аз таваҷҷуҳи хосаи роҳбарияти олии мамлакат ба ободонии Исфарамарз изҳори хушнудӣ намуда, ба Пешвои миллат муҳтарам Эмомалӣ Раҳмон миннатдории худро баён доштанд.
Дар идомаи сафар Раиси вилоят бо ҷараёни мумфаршкунии кӯчаи ба номи С. Абдуллоеви шаҳри Исфара шинос шуд. Дарозии роҳи мумфаршшаванда наздик се километрро ташкил дода, фармоишгари корҳо дирексияи сохтмонии иншооти ҳукуматии Дастгоҳи иҷроияи Президенти Ҷумҳурии Тоҷикистон мебошад.
Дар ин рӯз ҳамчунин ба корҳои мумфаршкунии роҳи кӯчаи Насрулло Асадуллоеви Ҷамоати деҳоти Чоркӯҳ низ оғоз бахшида шуд. Наздик 1 км роҳи кӯчаи мазкур бо маблағгузории мақомоти иҷроияи ҳокимияти давлатии вилоят ва аз ҷониби роҳсозони ҶДММ “Тоҷроҳ” мумфарш карда мешавад.
Манбаъ: Хадамоти матбуоти Раиси вилояти Суғд
Нет комментариев