Обхезӣ дар ноҳияи Кӯҳистони Мастчоҳ як кӯпрукро нобуд кард. Тавре роҳбари дастгоҳи ноҳияи мазкур Абдуллоҷон Ҳоҷиев тариқи телефони ба мо хабар дод, ин офат ба рафту омади сокинони 5 деҳа бо маркази ноҳия мушкилӣ эҷод кардааст.
Абдуллоҷон Ҳоҷиев: “Барои ба маркази ноҳия рафтан, барои ба дигар ҷо рафтан роҳи алтернативӣ ҳаст, вай роҳи алтернативиро раиси ноҳия масалан Раҷабзода М супориш карда буданд, то ба имрӯз аллакай аз тарафи мақомот 400 литр сӯзишворӣ ройгон дастрас гардид. Техникаи муассисаи давлатии нигоҳдории роҳҳои автомобилгарди ноҳия роҳи иловагиро барқарор карда истодааст”.
Аз ситоди ҳолатҳои фавқулодда ва мудофиаи граждании вилояти Суғд ба мо хабар доданд, ки ин ҳодиса шабона рух дода,хушбахтона талафоти ҷонӣ надоштааст. Ҳоло барои барқарор кардани роҳи офат чораҳо андешида шуда истодаанд.
“Дар натиҷаи гармии рӯзҳои охир сатҳи дарёи Зарафшон ва сойҳо баланд шуда, ки зарари худро ба хоҷагии халқи ноҳияи Кӯҳистони Мастчоҳ расонид. Аз ҷумла санаи 24 июл кӯпруки мошингузар бо дарозии 25 метр, ки аз болои дарёи Зарафшон, деҳаҳои Дашти обурдон, Вердос, Ғувинд, Ранҷ, Инбер ва Андарвашт, ки ноҳияҳои Кӯҳистони Мастчоҳро бо маркази ноҳия мепайваст шуста шуд, ки аҳолии ин деҳаҳо зиёда аз 2 ҳазор нафарро ташкил медиҳад ва дар натиҷаи шуста шудани сутунҳои битонии соҳили чап кӯпрук ба ҳолати садамавӣ дучор шуд ва аз болои вай гузаштан ғайриимкон гаштааст”.
Кӯпрук таи чанд рӯзи охир ҳолати садамавӣ дошта, аз ҳукумати ноҳияи Кӯҳистони Мастчоҳ ба мо хабар доданд, ки он аз кӯпрукҳои асосии сокинони 5 деҳаи дурдасти ноҳия маҳзуб мешуд. Айни замон сокинони ин деҳаҳо аз роҳҳои иловагӣ истифода бурда истодаанд. Ин роҳҳои иловагӣ 10-12 км масофаи роҳи сокинонро зиёд намудааст, гуфт роҳбари дастгоҳи ноҳия зимни сӯҳбати телефонӣ.
Абдуллоҷон Ҳоҷиев: “Ду се лоиҳакаш аст, лоиҳашро барои омода кардан ҳама аксҳоро гирифта ба раиси вилоят ирсол кардем, акнун ширкатҳои лоиҳакаш лоиҳа омода намуда, ки арзиши балансаш 1 млну 200 ҳазор мебошад барқарор карда мешавад”.
Маводи мазкур аз ТВ СМ-1 дастрас гардидааст.
Нет комментариев