Бо иштироки Раиси вилояти Суғд Раҷаббой Аҳмадзода, намояндагони аҳли зиёи мамлакат ва фаъолони ноҳияи Бобоҷон Ғафуров дар Қасри Арбоб маросими супоридани ҷоизаҳо ба ғолибони озмуни муштараки Нашрияи расмии Ҷумҳурии Тоҷикистон – рӯзномаи «Ҷумҳурият» ва мақомоти иҷроияи маҳаллии ҳокимияти давлатии ноҳияи Бобоҷон Ғафуров баргузор гардид.
Ҷоиз ба таъкид аст, ки рӯзномаи «Ҷумҳурият» моҳи январи соли равон якҷо бо мақомоти иҷроияи маҳаллии ҳокимияти давлатии ноҳияи Бобоҷон Ғафуров бахшида ба 21 — солагии Рӯзи Ваҳдати миллӣ ва ба хотири гиромидошти Қаҳрамони Тоҷикистон Бобоҷон Ғафуров озмун эълон намуда буд. Қабули маводҳо ба озмуни мазкур то 1 июн идома ёфт ва дар он журналистон ва адибону публитсистон иштирок доштанд. Маводҳои ба озмун пешниҳодшударо ҳайати ҳакамон баррасӣ намуда, барандагони онро муайян намуданд.
Раиси вилояти Суғд Раҷаббой Аҳмадзода зимни суханронии худ ҳайати меҳмононро, ки аз пойтахти мамлакат ба вилоят ташриф овардаанд, хайрамақдам гуфта, таъкид кард, ки бо талошу заҳматҳои пайвастаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон миллати тоҷик ба ваҳдати миллӣ даст ёфт ва хушбахтона имрӯз таҷрибаи сулҳофарии Тоҷикистон аз ҷониби кишварҳои ҷаҳон мавриди омӯзиш қарор дорад.
Раиси вилоят иброз дошт, ки ғояи ваҳдати миллӣ дар муттаҳидкунии мардум хизмати шоиста намуда, барои расидан ба дастовардҳои арзанда дар ҳамаи самтҳо замина фароҳам овард ва миллати тоҷик дар роҳи эъмори давлати демократӣ, ҳуқуқбунёду дунявӣ қадамҳои устувор гузошт.
Раҷаббой Аҳмадзода ташаббуси рӯзномаи «Ҷумҳурият» ва мақомоти иҷроияи маҳаллии ҳокимияти давлатии ноҳияи Бобоҷон Ғафуровро, ки ташкилкунандагони озмун ба ҳисоб мераванд, қобили дастгирӣ дониста, саҳми озмунро дар шинохти ҳарчӣ бештари хизматҳои Қаҳрамони Тоҷикистон Бобоҷон Ғафуров муҳим арзёбӣ намуд.
Мушовири бахши Ёрдамчии Президенти Ҷумҳурии Тоҷикистон оид ба масъалаҳои иҷтимоӣ ва робита бо ҷомеа Масрур Абдуллозода дар аснои суханронии худ қайд намуд, ки Бобоҷон Ғафуров аз ҷумлаи он шахсиятҳои барҷастаи миллат тоҷик аст, ки барои халқу миллат ва ватани худ хизматҳои шоиста намудааст. Маҳз бо назардошти фидокориҳояш ба фарзанди фарзонаи миллат унвони олии Қаҳрамони Тоҷикистон дода шудааст.
Сипас, дар вазъияти тантанавӣ ба ғолибони озмуни мазкур Кароматулло Олимов, Абдулхайр Маҳмадаминов, Ҳалимшо Пиримшоев, Аслиддин Низомӣ, Абдураҳмони Абдуманнон, Ҷамшед Ҷӯразода, Муҳаммад Ғоиб ва дар маҷмӯъ ба 22 нафар ҷоизаҳои мақомоти иҷроияи ҳокимияти давлатии вилояти Суғд, ноҳияи Бобоҷон Ғафуров ва рӯзномаи “Ҷумҳурият” супорида шуд.
Шоирони халқии Тоҷикистон Муҳаммад Ғоиб ва Камол Насрулло зимни суҳбат дар ҳузури иштирокчиёни чорабинӣ барои баргузории чунин озмун ба роҳбарияти вилояту ноҳияи Бобоҷон Ғафуров ва рӯзномаи “Ҷумҳурият” миннатдорӣ баён намуданд.
Манбаъ: Хадамоти матбуоти Раиси вилояти Суғд
Нет комментариев