Дар доираи Соли ҷавонон ва фарорасии Рӯзи ҷавонони Тоҷикистон дар миқёси шаҳри Хуҷанд силсилабарномаҳои варзишӣ ва маърифатию фарҳангӣ баргузор мегарданд.
Тавре аз Кумитаи иҷроияи Ҳизби Халқии Демократии Тоҷикистон дар вилояти Суғд хабар доданд, дирӯз дар ташкилоти ибтидоии «Гулчини маърифат»-и Кумитаи иҷроияи Ҳизби Халқии Демократии Тоҷикистон дар шаҳри Хуҷанд фестивал — озмун таҳти унвони «Ҳоло ки ман ҷавонам…» баргузор гардид.
Дар фестивал зикр гардид, ки «сиёсати давлату Ҳукумати Ҷумҳурии Тоҷикистон нисбат ба насли ҷавон сол то сол фарохтар мегардад. Ин аст, ки маҳз бо ташаббуси Пешвои миллат имсол дар ҷумҳурӣ Соли ҷавонон эълон гардид. Ҳоло ки мо дар арафаи Рӯзи ҷавонони Тоҷикистон қарор дорем, месазад, ки ба ғамхорию пуштибониҳои Пешвои миллат нисбат ба насли ҷавон содиқ буда, дар рушду шукуфоии Ватани азизамон саҳмгузор бошем».
Дар фестивал-озмун хонандагони синфҳои болоӣ фаъолона ширкат варзида, маҳорати хешро дар омодасозии хӯришҳо ва оши палов нишон доданд.
Баҳри болидахотирии иштирокчиёни озмун барномаи фарҳангӣ доир карда шуд.
Дар Хуҷанд Фестивали байналмилалӣ оид ба брейк-данс доир шуд
Бо дастгирии Мақомоти иҷроияи ҳокимияти давлатии вилояти Суғд 13 май дар Кохи фарҳангии Суғдиён бахшида ба Соли ҷавонон таҳти унвони «Баттл Суғд интернейшнл» (International battle Sogd) фестивал-озмуни байналмилалӣ оид ба брейк-данс баргузор шуд.
Тавре аз Мақомоти иҷроияи ҳокимияти давлатии вилояти Суғд хабар доданд, дар фестивал-озмун 8 даста ширкат варзида, барои гирифтани ҷоми фестивал мубориза бурданд. Аз ҷумла, дастаи брекдансчиёни давлати Қазоқистон, Ҷумҳурии Қирғизистон, дастаҳо аз шаҳру ноҳияҳои Қӯрғонтеппа, Душанбе, Хуҷанд, Бобоҷон Ғафуров ширкат варзиданд.
Фестивал-озмунро дар Кохи фарҳангии Суғдиён дар ҳузури бештар аз 500 нафар мухлисон муовини Раиси вилояти Суғд Назира Ғаффорӣ ифтитоҳ бахшид. Дар вилояти Суғд бештар аз 100 нафар ҷавонон бо ин навъи варзиш машғул ҳастанд, ки барои онҳо тамоми шароит муҳайёст.
Мусобиқа таҳти доварии чемпиони секаратаи ҷаҳон, довари дараҷаи байналмилалӣ Ҷамол Асадуллоев оғоз гардид. Дар даври аввал мусобиқа байни дастаҳои Қазоқистон- Душанбе, Қирғизистон- Хуҷанд-2, Қӯрғонтеппа-Хуҷанд 3, Хуҷанд 1- Суғд бо намоиши ҳунари баланди ин санъати муосир баргузор шуд. Ба қисмати нимфиналӣ дастаҳои Қазоқистон, Қирғизистон, Душанбе ва Хуҷанд-1 баромаданд. Баъдан барои ҷои аввал мубориза байни дастаҳои Қазоқистон-Қирғизистон ва барои ҷои сеюм байни дастаҳои Душанбе-Хуҷанд баргузор шуд.
Дар натиҷа дастаи Қазоқистон ҷои аввал, Қирғизистон ҷои дуюм ва Душанбе ҷои сеюмро сазовор гардиданд. Дар вазъияти тантанавӣ муовини Раиси вилояти Суғд Назира Ғаффорӣ ва муовини Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Дилноза Аҳмадзода ба ғолибон Ҷом, диплом ва мукофотпулиҳоро тақдим намуданд.
Муовини Раиси вилояти Суғд Назира Ғаффорӣ ғолибонро муборакбод намуда, зикр кард, ки ин фестивал дар такмили дӯстии ҷавонони кишварҳои ҳамҷавор нақши бориз дорад ва аз ҷониби дигар дар рушди ин навъи варзиш қадами ҷиддӣ хоҳад буд
Намоянда аз Қазоқистон Одил Ёсимуҳанов барои қабули гарму самимӣ ва баргузории фестивали сатҳи баланд ба роҳбарияти вилоят ва ташаббускорони он арзи сипос кард.
Меҳмонон аз ҷойҳои таърихии вилоят, чун Қасри маданияти Арбоб, Маҷмааи таърихӣ-фарҳангии Истиқлол, Музеи кишваршиносӣ, Маҷмааи таърихию фарҳангии Қалъаи Хуҷанд низ боздид намуданд.
Толибилмон бо ҳаёти сарбозӣ ошно гардиданд
Дар асоси нақшаи чорабиниҳо қарори Раиси шаҳри Хуҷанд аз 3 майи соли 2017, №244 «Дар бораи таҷлили Рӯзи ҷавонони Тоҷикистон дар шаҳри Хуҷанд, таҳти унвони «Ҷавонон – пайрави Пешвои миллат»», санаи 12 майи соли равон дар қисми ҳарбии 3501-и Қӯшунҳои дохилии Вазорати корҳои дохилии Ҷумҳурии Тоҷикистон дар шаҳри Хуҷанд, «Рӯзи дарҳои кушод» баргузор гардид.
Чорабинии мазкур бо мақсади тарбияи ватандӯстии ҷавонон ва боло бурдани сатҳи омодагӣ ба хизмати ҳарбӣ доир гашта, дар он зиёда аз 400 нафар хонандагони синфҳои болоии мактабҳои таҳсилоти умуми макотиби шаҳр иштирок намуданд. Дар маросими кушодашавии чорабинии мазкур мудири бахши ҷавонон, варзиш ва саёҳоии шаҳри Хуҷанд Бахтиёр Исматҷонов ва Командири қисми ҳарбии 3501-и Қӯшунҳои дохилии Вазорати корҳои дохилии Ҷумҳурии Тоҷикистон полковник Н.Умарзода суханронӣ намуданд. Дар маросими кушодашавии аз ҷониби масъулини баталёни 2-юми фаврии таъйиноти махсуси қисми ҳарбӣ машқҳои тан ба тан ва аз ҷониби масъулини баталёни 3-юми патрули пайраҳадории қисми ҳарбӣ машқҳо бо сипар намоиш дода шуд. Хонандагон аз ҳаёту фаъолияти рӯзмарраи ҳайати шахсӣ шинос шуда, аз ҷониби бахши ҷавонон варзиш ва сайёҳӣ ба сарбозону афсарон лавозимоти гигиенӣ ва сипосномаю тӯҳфаҳои хотиравӣ тақдим када шуданд.
Нет комментариев