Мӯди нави либоси зимистона аз матои атлас дар Тоҷикистон. Атласи рангорангу зеборо занону духтарон асосан дар ҷашнҳои баҳорӣ ва маъракаҳо ба бар мекарданд. Вале, солҳои охир либоси атлас ба як либоси маъмулӣ ва кории занон табдил ёфтааст.
Тарроҳони тоҷик мегӯянд, ки бо таваҷҷӯҳ ба талаботи зиёд ба либосҳои аз атлас омодашуда зимистони имсол ба муштариёни худ болопӯшҳои гармро аз атласу адрас омода ва пешниҳод карда истодаанд.
Мӯди чор фасли солро маъмулан дар Тоҷикистон тоҷирон муайян мекунанд. Аммо дар мӯди тирамоҳӣ ва зимистони имсол нақши тарроҳони тоҷик ҳам кам нест.
Дар фаъолияти даҳсолаи худ тарроҳи тоҷик Мурод Бобоқулов як коллексияи либосҳои зимистонаро омода кард. Вай даҳ навъ либоси болоии бо дӯхту тарҳи мухталиф аз матои атласу адрасро пешниҳоди дӯстдорони либоси замонавӣ кард ва ин болопӯшҳо ҳам ба гуфти тарроҳ зуд харидори худро пайдо кардаанд.
Роҳбари хонаи муди “Murod fashion” М.Бобоқулов гуфт, ки “имсол талабот ба атлас зиёд буд. Коллексияи наве, ки мо омода кардем, барои зимистон аз атласҳои сифати олӣ омода шудаанд ва зери борону барф ҳам пӯшида мешаванд.”
Либосҳои болоии атлас шабеҳи ҳамон ҷомаҳои қадимиянд, ки аз матои атласу адрас барои ҳам занон ва ҳам мардон дастдӯзӣ мешуданд. Ин ҷомаҳо вобаста ба сифати матоъ ва дӯхт аз 300 то 1000 сомонӣ арзиш доранд. Онҳое, ки имрӯз ба ҷойи болопӯшҳои гарм аз “драп” ва дигар матоъҳо ба ҷомачаҳои пахтагӣ ва атлас бартарӣ медиҳанд, мегӯянд, ки бо ин либос худро зебову замонавӣ ҳис мекунанд.
Атлас — матои рангоранг ва нозукро аслан то солҳои охир занону духтарон дар ҷашнҳои баҳорӣ ва тӯю маъракаҳо ба бар мекарданд. Аммо солҳои охир дигар либосҳо аз ин матоъ ба як либоси маъмулӣ ва кории занон табдил ёфтааст. Ҳоло доману куртаҳои аврупоӣ, костюм, ҳамён ва акнун минбаъд болопӯшҳои мухталифу замонавӣ дар мӯд ва серистифода хоҳад шуд. Ба гуфти тарроҳон дар серхарид шудани либосҳо аз атлас нақши ҳукумат ҳам ҳаст, ки бо роҳандозии маъракаҳои мухталиф фарҳангу либоси миллӣ, бахусус, атласро тарғиб мекунад.
Тарроҳи маъруфи тоҷик Хуршед Сатторов гуфт, ки таҳияи ин намуд ҷомаҳо хеле осонанд. Инҳо намунаи ҳамон куртаву ҷомаҳои қадимии мо тоҷиконанд, аммо нишонаҳои муосир доранд.
Тарроҳи дигари тоҷик Нафиса Имронова мегӯяд, ки дар Аврупо ҳам ҳоло ҷомачаҳо дар мӯданд. Аврупоиҳои мудерн ин чапонҳоро хеле дӯст медоранд ва онро бо куртаҳои идона ва куртаҳои маъмулӣ ба бар мекунанд, ба монанди духтарҳои худамон.”
Алҳол тарроҳон дар баробари занон барои мардон низ бо омезиши атлас либосҳои гарми замонавӣ таҳия мекунанд. “Ман аслан бештар бо занон кор мекардам, аммо солҳои охир мардон ҳам муроҷиат мекунанд. Фикр кардам ҳамин хел жемперҳо барои мардон ҳам омода кунем. Мардҳо аслан либосҳои рангорангро чандон дӯст намедоранд. Барои онҳо либосҳои якранг ё дуранга мувофиқ аст,” — гуфт тарроҳ Мурод Бобоқулов.
Тарроҳони тоҷик, ки тавонистанд имсол дар мӯди зимистона тағйироте ворид кунанд ва либосҳои болоии миллиро вориди бозор намоянд, акнун дар фикри тарҳи пироҳану нимтанаҳои баҳорӣ ҳастанд ва он ҳам бо истифода аз матои атласу адрас. Онҳо бовар доранд, ки ин матои рангоранг талабгору харидори зиёде хоҳад дошт.
Нет комментариев