Тибқи иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, то 13 апрел 1836 нафар шаҳрвандоне, ки аз кишварҳои хориҷи мамлакат ба Ҷумҳурии Тоҷикистон ворид гардидаанд, дар муассисаҳои тандурустӣ ва осоишгоҳҳои мамлакат ба карантин фаро гирифта шуданд.
Дар ин давра оё аёдати нафарони зери карантин қарордошта иҷозат дода мешавад? Наздиконашон метавонанд барои онҳо ягон чиз, масалан китоб, ғизо ё либос биёранд?
Дар ин бора Вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода чунин иброз дошт: «Карантини 14 — рӯза меъёри байналмилалист, ки дар ин муддати ташхис гумонбар бо олами беруна набояд ягон хел иртибот дошта бошад. Дар Тоҷикистон низ ин тартиб қатъиян риоя мегардад. Яъне, аёдати ашхоси карантинӣ аз ҷониби пайвандон иҷозат дода намешавад. Лекин хӯрок овардани хешовандон манъ нашудааст. Онро шахси масъул қабул карда, бо риояи қоидаҳои бехатарӣ ба гумонбар мерасонад. Ғайр аз ин, тавассути телефон тамос гирифтан иҷозат аст».
Хотиррасон менамоем, ки барои ба карантин фаро гирифтани шаҳрвандоне, ки аз хориҷи мамлакат ба Тоҷикистон воирд мешаванд, баъзе муассисаҳои тандурустии Вилояти Мухтори Кӯҳистони Бадахшон, вилоятҳои Хатлону Суғд, шаҳру ноҳияҳои Турсунзода, Ҳисор, Варзоб ва Тоҷикободу Лахш сафарбар гардидаанд. Ҳамчунин дар шаҳри Душанбе дар муассисаҳои давлатии беморхонаи клиникии бемориҳои сироятӣ, маркази шаҳрии тиббии № 1, беморхонаи шаҳрии бемориҳои пӯст, маркази ҷумҳуриявии клиникии бемориҳои пӯст, маркази ҷумҳуриявии клиникии бемориҳои чашм шаҳрвандон ба карантин фаро гирифта мешаванд.
Бо дарназардошти афзоиши шумораи ҳамватанони аз кишварҳои хориҷӣ баргашта, ки ба карантин фаро гирифта мешаванд, зарур омад, ки ба ҷуз аз муассисаҳои тандурустӣ истироҳатгоҳу осоишгоҳҳо, дигар муассисаҳои вазорату кумитаҳо ва корхонаҳо низ мавриди истифода қарор гиранд. Аз ҷумла, осоишгоҳҳои “Хоҷа Оби Гарм”, “Харангон” (ноҳияи Варзоб), “Оламбӣ” (шаҳри Роғун), осоишгоҳҳои Вазорати корҳои дохилӣ ва Вазорати меҳнат, муҳоҷират ва шуғли аҳолӣ.
Тибқи иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, ҳамаи шароити будубош, муоинаву ташхиси тиббӣ, маводи доруворӣ, озуқаворӣ ва хизматрасонии тиббӣ дар ин муассисаҳо ба таври ройгон пешниҳод шуда истодааст. Дар чанд марҳила аз Федератсияи Россия тестҳои зарурӣ дастрас карда шуданд. Ҳамчунин дигар таҷҳизоти зарурии ташхис ва маводи яккарата, маҳлулҳои безараргардонӣ бо кумаки бархе шарикони рушд дастрас гардида, баъзе аз ин мавод дар дохили худи ҷумҳуриямон истеҳсол мешаванд. Ҳоло 20 муассиса ба истеҳсоли ниқобу хилъатҳои яккаратаи тиббӣ машғул аст. Бо супориши вазорат ва ситоди назди он амалкунанда ҳама муассисаҳо, новобаста аз шакли идора ва моликият, кормандони худро бо маводи яккаратаи тиббӣ ва маҳлулҳои безараргардонӣ таъмин менамоянд.
Манбаъ: АМИТ «Ховар»
Нет комментариев