Бахшида ба 23-юмин солгарди таъсисёбии Қувваҳои мусаллаҳи Ҷумҳурии Тоҷикистон дар Донишкадаи политехникии Донишгоҳи техникии Тоҷикистон ба номи академик М.С. Осими озмуни «Ҳомиёни Ватан» доир гардид.
Дар расми ифтитоҳи чорабинӣ муовини директор Фаррух Аминов устодону шогирдонро ба муносибати солгарди ин санаи таърихӣ аз номи директори донишкада табрик намуд.
Акмал Нӯъмонов, мудири шӯъбаи омодагӣ ва даъват ба сафи Артиши миллии комиссариати ҳарбии шаҳри Хуҷанд ва Муҳаммадсалим Ҳайитов, мудири шӯъбаи ташкилии кумитаи иҷроияи ҲХДТ дар шаҳри Хуҷанд дар бораи дирӯз ва имрӯзи Қувваҳои мусаллаҳи кишвар маърӯза намуданд.
Дар вазъияти тантанавӣ ба якчанд нафар донишҷӯёни фаъол шаҳодатномаи ҳизбӣ супорида шуд.
Сипас донишҷӯён аз рӯи панҷ шарт — саломнома, маҳорати тӯбронӣ дар навъи варзишии баскетбол, сангбардорӣ, муаррифии касби интихобкарда ва саволу ҷавоб байни ҳам рақобат намуданд.
Донишҷӯёни факултети сохтмон бо ба даст овардани холи аз ҳама бештар сазовори ҷойи якум гардиданд. Зинаҳои баъдиро донишҷӯёни факултети информатика ва энергетика ва муҳандисӣ- технологӣ ба даст оварданд. Ба ғолибон сипоснома ва тӯҳфаҳои хотиравӣ супорида шуд.
Манбаъ: Хадамоти матбуоти Раиси вилояти Суғд
Нет комментариев