Ба ифтихори Рӯзи байналмилалии озодии сухан, ки ҳамасола санаи 3-юми май таҷлил карда мешавад, дар Кохи матбуоти шаҳри Хуҷанд Конфронси вилоятии “Озодии баён: мушкилот ва дурнамо” баргузор гардид.
Дастаи Медиапортали “Тироз” низ дар қатори зиёда аз 60 нафар намояндагони ВАО, мақомоти давлатӣ, созмону ташкилотҳои рӯзноманигорӣ ва ҳимояи ҳуқуқи инсон дар кори конфронс иштирок намуд.
Ҳадаф аз гузаронидани конфронс таҳлили дастовард, мушкилот ва пешомадҳои ВАО дар Тоҷикистон дар як соли охир ва таҳияи тавсияҳо барои рушди озодии матбуот дар кишвар буд.
Он аз ҷониби Шӯрои ВАО-и Ҷумҳурии Тоҷикистон, АМВАОМТ, Иттиҳодияи журналистони Тоҷикистон, Ташкилоти ҷамъиятии “Хома” бо дастгирии Дафтари САҲА дар Ҷумҳурии Тоҷикистон, Сафорати ИМА дар Тоҷикистон, Намояндагии Институти инъикоси ҷанг ва сулҳ дар Ҷумҳурии Тоҷикистон, Институти “Ҷамъияти Кушода” — Бунёди Мадад дар Тоҷикистон, Намояндагии Иттиҳоди Аврупо дар Ҷумҳурии Тоҷикистон созмон дода шуд.
Раиси Шӯрои ВАО-и Ҷумҳурии Тоҷикистон Хуршедҷон Ниёзов конфронсро ифтитоҳ намуда, зикр кард, ки имрӯза конфронс идомаи мантиқии Конфронси ҷумҳуриявии “Озодии баён: мушкилот ва дурнамо” мебошад, ки санаи 3-юми май дар Душанбе доир гардид.
Намояндаи Мақомоти иҷроияи ҳокимияти давлатии вилояти Суғд, мудири шӯъбаи иттилоот ва таҳлили Дастгоҳи Раиси вилоят Музаффар Юнусов оид ба дастгириву қадршиносии хабарнигорони ВАО аз ҷониби мақомоти давлатӣ, ҳамасола ташкил ва гузаронидани Озмуни вилоятии “Хомаи созанда” сухан кард.
Намояндаи Дафтари САҲА дар Тоҷикистон Фаррухшо Ҷунайдов доир ба мақсади баргузории конфронс ибрози андеша намуд.
Сипас ба хотираи қурбониёни роҳи озодии сухан дар Тоҷикистон, аз ҷониби ҷамъомадагон лаҳзаи сукут ба ҷо оварда шуд.
Дар оғози кори конфронс раиси Шӯрои ВАО-и Ҷумҳурии Тоҷикистон Хуршедҷон Ниёзов дар мавзӯҳои “Масъалаҳои асосии расонаҳо ва журналистон” ва “Вазъи умумии озодии баён дар Тоҷикистон” сухан карда, қайд намуд, ки аз сабаби таъсири бӯҳрони иқтисодӣ чанд нашрия аз қабили “Имрӯз news”, «Вечерний Душанбе” аз нашр бозмонданд. Хушбахтона, баҳсҳои судӣ ва паси панҷара рафтани хабарнигорон нисбат ба солҳои пешин кам шудааст. Вале, сатҳу сифати маводи нашрияҳо низ паст рафтааст. Маводи ҷиддии таҳлилию танқидӣ кам ба мушоҳида мерасанд.
Бисёр шудани сомонаҳои интернетӣ дар Тоҷикистон хуб аст, вале рӯй овардани мардум ба матбуот хеле кам шудааст. Мухлати гузариш ба пахши рақамӣ бошад, дар Тоҷикистон то соли 2020 дароз карда шуд.
Директори Ташкилоти ҷамъиятии “Машварати расонавӣ” Набӣ Юсуфов дар хусуси “Маҳдудияти озодии ВАО ҳамчун омили заифшавии амнияти иттилоотӣ дар кишвар” ибрози андеша карда, гуфт, ки нуфуз (рейтинг)-и озодии баён дар Тоҷикистон аз ҷойи 116 ба 150 фаромад. ВАО, бахусус рӯзномаю маҷаллаҳои мустақил ба мушкилоти сахти молиявӣ дучор шудаанд. Масалан, шумораи нашрияҳои мустақил то 50 – 60 фоиз кам шудааст. Дар баъзе нашрияҳо ҳаҷми даромад ва ё фоида то ба 75 фоиз кам гардидааст. Ин мушкилиҳо ба он оварда расонидааст, ки журналистони соҳибтаҷриба ва соҳибқалам аз кор дар сохаи журналистика рафта истодаанд.
Котиби матбуотии раиси шаҳри Хуҷанд Маҳмудҷон Дадобоев дар мавзӯи “Риояи меъёрҳои касбӣ ахлоқӣ дар таҳкими озодии баён”андешаҳои хешро баён намуда, қайд кард, ки алҳол дар шаҳри Хуҷанд 6 телевизион ва 6 радиои маҳаллии мустақил фаъолият менамоянд. Ҳангоми омодакунии мавод дар ВАО хабарнигорон меъёрҳои касбӣ ва ахлоқиро дуруст риоя намекунанд. Масалан, тарзу усули муносибати хабарнигорон ба сарчашмаю манбаъҳои иттилоотӣ барои гирифтани маълумоти зарурӣ, тарзи саволгузориву дархост ва масъалагузорӣ на он қадар хубу қобили қабул аст. Ҳамзамон, забони ВАО, бахусус, баъзе радиоҳои мустақил, ки пахши мустақим доранд, дар одоби муошират ва саволгузорӣ хеле камбудӣ ба гӯш мерасанд. Ҳангоми таҳияи гузоришҳои иттилоотӣ дар баъзе телевизионҳои маҳаллӣ меъёрҳои ҳуқуқӣ ва ахлоқӣ риоя карда намешаванд.
Сипас байни баромадкунандагон ва иштирокдорон саволу ҷавоб сурат гирифт. Дар рафти он сармуҳаррири нашрияи “Зарафшон”-и шаҳри Панҷакент Луқмон Қурбонов, раиси Иттиҳоди журналистони Тоҷикистон дар вилояти Суғд Илҳоми Ҷамолиён ва хабарнигорони дигар Н.Мирсаидов, М.Раҷабов, Н.Юсуфов, Раҷаби Мирзо ва дигарон иштирок намуданд.
Ҳамин тавр, раиси Иттиҳоди журналистони Тоҷикистон дар вилоят Илҳоми Ҷамолиён дар мавзӯи “Мушкилот ва пешомади ВАО дар Суғд”, мудири кафедраи журналистика ва назарияи тарҷумаи ДДХ ба номи академик Б.Ғафуров Дилбар Самадова дар мавзӯи “Нақши расонаҳо дар тарбияи кадрҳои ҷавон” ва корманди нашрияи вилоятии “Ҳақиқати Суғд” Набиюллоҳ Суннатӣ дар мавзӯи “Халои (вакууми) иттилоотӣ ва амнияти иттилоотӣ” ибрози назар намуданд.
Дар фарҷоми конфронс иштирокчиён ба саволҳои хеш дар бобати мушкилоту дурнамо ҷавобҳои қаноатбахш гирифтанд.
Хулоса, Конфронси вилоятии “Озодии баён: мушкилот ва дурнамо” басо муфид ва хотирмону таъсирбахш гузашт.
Нет комментариев