Olá amigos. Инак оғоз менамоем бо хабарҳои нав. Олим Қурбонов мутаассифона, бо ҳамроҳии Анвар Юнусов ва Комроншоҳи Устопириён ба Ватан бармегардад. Дар намуди шиноварӣ бо тарзи озод барои масофаи 50 метр ӯ сазовори мақоми чорум гардид.
Юлия Ефимова
Умеди асосии мухлисони Русия ба шиноварӣ нигаронида шуда буд. Вале дар масофаи 200 метр варзишгарзан Юлия Ефимова чун дар масофаи 100 метр ҷойи дуюмро гирифт. Мақоми аввал насиби варзишгар аз Ҷопон Рии Кането шуд.
Дар варзиши намуди озод боз як медали тиллоро Симоне Мануэл аз Амрико соҳиб гардид.
Дар гимнастикаи варзишӣ Алия Мустафина мақоми сеюмро гирифт. Медали тилло насиби Симоне Байлс ва медали нуқра насиби Александр Райсман — ҳар ду варзишгари Амрикоӣ шуд.
Дар намуди дзюдо дар вазни то 100 кг байни мардон Лукаш Крпалек аз Чехия беҳтарин дониста шуд. Дар байни занон дар вазни то 78 кг Кайла Харрисон аз ИМА ғалаба ба даст овард.
Дар намуди дучархаронии даставӣ байни мардон бурд насиби Британияи Кабир шуд.
Дастаи мунтахаби Фиджӣ дар намуди регбӣ ғолиби Бозиҳои олимпӣ дар Рио-де-Жанейро гардид. Дар мусобиқаи ниҳоӣ намояндагони ин давлат аз болои дастаи мунтахаби Британияи Кабир бо ҳисоби 43:7 ғалаба намуданд. Бурди медали тилло барои Фиджӣ дар таърихи Бозиҳои олимпӣ бори нахуст ба даст омад.
Варзишгарзан аз Хитой Чэн Сини мумкин аст аз иштирок дар Бозиҳои олимпии соли 2016 дар Рио-де-Жанейро аз сабаби натиҷаи мусбати санҷиши допингӣ барканор монад. Шиновар норозигии хешро барои он изҳор кард, ки санҷиши допингӣ берун аз Бразилия гузаронида шуд. Ӯ ба CAS бо номаи шикоятӣ муроҷиат кардааст.
Мухлисони Бразилия ба Чемпиони дукаратаи олимпӣ дар Лондон, бозингари давлати Хитой дар намуди тенниси рӯи миз Чжан Цзикэ барои даъваташ ҷиҳати хомӯшӣ, ҳуштаккашӣ намуданд. Ӯ ҳангоми мусобиқа бо варзишгари Белорус ногаҳон аз тамошобинон дағалона хоҳиш намуд, ки ором нишинанд.
Мураббии дастаи мунтахаби давлати Кения аз рӯи варзиши сабук Джон Анзрах аз Бозиҳои олимпии соли 2016 дар Рио-де-Жанейро аз сабаби вайронкунии қоидаи зидди допингӣ барканор шуд. Ӯ кӯшиш кард, ки ба ҷойи варзишгар Фергюсон Ротич бо истифода аз ҳуҷҷатҳояш, тести допингӣ супорад.
Имрӯз дар Олимпиада якбора ду варзишгари олимпӣ дзюдочӣ Муҳаммадмурод Абдураҳмонов аз Тоҷикистон ва Алекс Гарсия Мендос аз давлати Куба дар вазни беш аз 100 кг вориди рақобат мешаванд.
Ҳамзамон, шиновари Тоҷикистон дар намуди озод Анастасия Тюрина дар масофаи 50 метр дар мусобиқа иштирок менамояд.
Имрӯз дар бозиҳои тобистонаи олимпӣ 24 маҷмӯи медалҳо бурд карда мешаванд. 4 медал дар намуди шиноварӣ ва заврақронии академӣ, 3 дар варзиши сабук, 2-тогӣ медал дар дучархаронӣ, дзюдо, тирандозӣ, вазнбардорӣ ва 1-тогӣ медал дар намуди аспдавонӣ, тенниси рӯи миз, камонварӣ ва шамшербозӣ.
Пас аз рӯзи шашуми бозиҳо дар мақоми якум ИМА бо 16 медали тилло, дар мақоми дуюм Хитой бо 11 медали тилло ва дар ҷойи сеюм Ҷопон бо 7 медали тилло қарор доранд.
Тамошо кардани Олимпиадаро давом медиҳем.
Хайр, то вохӯрии минбаъда!
Нет комментариев