Дар партави сиёсати хирадмандонаи Сарвари давлат Эмомалӣ Раҳмон бо мақсади ҳалли масъалаҳои демографӣ, тақвияти муҳоҷирати дохилию экологии аҳолии қобили меҳнат аз ноҳияҳои камзамину сераҳолӣ ба водиҳои дорои заминҳои бекорхобидаи ҷумҳурӣ, ташкилу бунёд намудани шаҳраку деҳаҳои нави замонавӣ ва таъсиси ҷойҳои нави корӣ, сафарбар намудани шаҳрвандон ба ҷойҳои бехавф қарорҳои Ҳукумати Ҷумҳурии Тоҷикистон аз 3 декабри соли 2012, №677 «Дар бораи муҳоҷирати дохилии аҳолӣ аз ноҳияҳои камзамин ва сераҳолии кӯҳистон ба водиҳоии дорои заминҳои бекорхобидаи ҷумҳурӣ дар солҳои 2013-2015» ва аз 2 ноябри соли 2013, №474 «Дар бораи кӯчонидани муҳоҷирони экологӣ дарҶумҳурии Тоҷикистон барои солҳои 2014-2016» қабул шудаанд.
Оид ба ҷараёни иҷрои қарорҳои мазкур дар шаҳру ноҳияҳои вилояти Суғд давоми ҳафтаи гузашта гурӯҳи корӣ таҳти сарварии Сардори Хадамоти муҳоҷират Тоҳир Каримзода ва Сардори Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд Зайнура Шарифова корбарӣ намуда, барои ҳалли муаммоҳои ҷойдошта дар доираи ваколатҳои Хадамоти муҳоҷират таъсиррасонӣ намуданд. Вобаста ба сафари корӣ вохӯрии бевосита бо раисони шаҳру ноҳияҳо, муовинони соҳавии онҳо, ки сарпарастии ин соҳаро ба зимма доранд, раисони ҷамоатҳои шаҳраку деҳот, муҳоҷирони дохилию экологӣ ва меҳнатӣ, ҳамзамон намояндагони табақаҳои мухталифи аҳолӣ роҳандозӣ гардида, ба ҳалли як қатор масъалаю мушкилотҳои ҷойдошта мусоидат карда шуд.
Гурӯҳи корӣ ба шаҳру ноҳияҳои Исфара, Панҷакент, Ашт, Шаҳристон, Ҷ. Расулов, Ғончӣ ва Айнӣ ташриф оварда, бо муҳоҷирони дохилию экологӣ, шахсони масъул ва намояндагони табақаҳои гуногуни аҳолӣ мулоқоту гуфтугузорҳои ошкоро доир кард.
Тибқи қарорҳои Ҳукумати Ҷумҳурии Тоҷикистон нақшаи муҳоҷирати дохилию экологии аҳолӣ барои солҳои 2013-2016 тасдиқ гардида, Вазорати меҳнат, муҳоҷират ва шуғли аҳолии Ҷумҳурии Тоҷикистон ва сохторҳои маҳаллии он вазифадор гардидаанд якҷоя бо мақомоти иҷроияи маҳаллии ҳокимияти давлатии вилоятҳо, шаҳру ноҳияҳо ва вазорату идораҳои дахлдори ҷумҳурӣ иҷрои саривақтии нақшаро таъмин намоянд.
Мутобиқи ин нақша шумораи умумии оилаҳои муҳоҷирони дохилии вилоят дар ин солҳо 367 оила ва муҳоҷирони экологӣ 164 оиларо ташкил медиҳад.
Дар доираи талаботи қарорҳои болозикр ҳар оила аз қарзи имтиёзнок ба маблағи 3000 сомонӣ ва кӯмаки яквақтаина бархурдор гаштаанд.
Ҳамин тариқ, ҳамаи масъалаҳое, ки ба салоҳияти Хадамоти муҳоҷират дохил мегарданд, аз ҷумла: дохил намудан ба рӯйхат, ба қайд гирифтани муҳоҷирон, таъмин намудан бо қитъаи замини наздиҳавлигӣ дар маҳалли аҳолинишини навбунёд, қарзҳои имтиёзнок ва кӯмаки яквақтаина сари вақт ҳалли худро ёфтаанд.
Дар ин бора sugd.tj хабар медиҳад.
Нет комментариев