Ноҳияи Мурғоб — яке аз ноҳияҳои Вилояти Мухтори Кӯҳистони Бадахшон аст.Ин ноҳия 27 октябри соли 1932 таъсис ёфтааст. Маркази ноҳияи Мурғоб шаҳраки Мурғоб аст, ки 324 км шарқтар аз шаҳри Хоруғ дар канораи рӯди Марғоб ҷой дорад.
Ноҳияи Мурғоб дар шимол бо вилояти Уши Қирғизистон, дар шарқ бо ноҳияи мухтори Синчиён-Уйғуристони Чин, дар ҷануб бо вилояти Бадахшони Афғонистон ҳаммарз мебошад. Ин ноҳия дар шимолу ғарб бо ноҳияҳои Тавилдараву Ҷиргатол ва дар ғарб бо ноҳияҳои Ванҷ, Рӯшон, Шуғнон, Роштқалъа ва Ишкошим ҳамсоя аст.
Аз шарқи ноҳияи Мурғоб ба ғарби он рӯдҳои Марғоб ва Ғунд гузар мекунанд, ки ба рӯди Панҷ мерезанд.
Ноҳияи Мурғоб 38442,2 км² масоҳат дорад. Ноҳияи Мурғоб, ки дар баландии беш аз 3,5 ҳазор метр аз сатҳи баҳр ҷойгир буда, яке аз нодиртарин маконҳои дидании вилояти Бадахшони Тоҷикистон аст, барои зиндагии инсон чолишҳои худро дорад. Баландкӯҳи сарду зебоманзар на ба ҳар инсон барои зиндагӣ мувофиқ аст. Камбуди шадиди оксиген аз хусусиятҳои вижаи табиати Мурғоб мебошад. Тӯли умри инсон дар ноҳия аз 55 то 65 солро ташкил медиҳад.
Нет комментариев