Раиси вилояти Суғд Раҷаббой Аҳмадзода аз ҷараёни корҳои ободонию бунёдкорӣ дар шаҳри Хуҷанд боздид ба амал овард.
Раҷаббой Аҳмадзода нахуст аз раванди корҳои таъмиру таҷдиди роҳи кӯчаи Саид Валиев (маҳаллаи Чашмаи Арзана)-и шаҳр шинос гардида, ба масъулин ҷиҳати босифат иҷро намудани корҳои таъмирӣ дастуру супоришҳо дод. Роҳбари вилоят бо гуруҳи калони сокинони маҳаллаи Чашмаи Арзана ва роҳбарони корхонаҳои ин маҳал сӯҳбати ошкорову самимӣ намуд. Зикр гардид, ки бо эълон гардидани соли 2018 “Соли рушди сайёҳӣ ва ҳунарҳои миллӣ” дар шаҳри Хуҷанд силсилаи зиёдӣ корҳои ободониву бунёдкорӣ ба нақша гирифта шудааст. Аз ҷумла, бо мақсади ба талаботи замони муосири шаҳрсозӣ риоя намудани роҳҳои канории шаҳр ва хиёбонҳои асосии маркази вилоят таҷдиду азнавсозӣ, чароғонкунӣ ва дигар тадбирҳои зарурӣ андешида мешавад. Ба ин амали хайр бояд соҳибкорону мардуми маҳал низ ҳамрайъӣ намуда, кӯча, маҳалла ва шаҳри хешро якдилона ободу хуррам намоянд.
Ба роҳбарияти шаҳри Хуҷанд ҷиҳати расидагӣ намудан ба мушкилоти сокинони маҳаллаи Чашмаи Арзана дастуру супоришҳои мушаххас дода шуд.
Ҳамзамон Раиси вилоят Суғд Раҷаббой Аҳмадзода ба маъракаи мумфаршкунии кӯчаи ба номи И. Репини хиёбони ба номи Раҳим Ҷалил низ ҳусни оғоз бахшид.
Иттилоъ дода шуд, ки сокинони маҳалла 270 метр масофаи кӯчаи хешро тариқи ҳашар ва бо дастгирии Мақомоти иҷроияи ҳокимияти давлатии шаҳри Хуҷанд мумфарш намуда истодаанд. Ин имкон медиҳад, ки рафту омади сокинони маҳал осон ва зебою ороста гардида, ободии кӯча ба хуррамии хиёбони ба номи Раҳим Ҷалил ҳусни дигар зам менамояд.
Раҷаббой Аҳмадзода ин иқдоми сокинони маҳалларо тадбири шоиста унвон намуда, намунаи беҳтарин барои пайравӣ ба дигар сокинони кӯчаю маҳаллаҳои шаҳр арзёбӣ намуд. Ба Раиси шаҳри Хуҷанд Маъруф Муҳаммадзода дастур дода шуд, ки бо ҷалби идораву ташкилот ва сокинони маҳаллаҳо чунин амалҳои хайрхоҳона идома дода шавад. Ҷоиз ба зикр аст, ки дар шаҳри Хуҷанд 164,9 км роҳҳои автомобилгард, 318,0 ҳазор метри тӯлонӣ роҳрав, 175,9 ҳазор метри тӯлонӣ ҷӯйборҳо ва 2 адад кӯпрук вуҷуд дорад. Бо мақсади ба талаботи муосир ҷавобгӯй будани роҳҳо, дар ин давра зиёда аз 5 километр таъмиру барқарорсозии ҷӯйборҳо ва деворчаҳои бетонии қадди роҳҳо ба сомон расонида шуданд. Тибқи нақшаи тасдиқшуда соли ҷорӣ 32,5 км таъмири роҳҳои автомобилгард, аз ҷумла 12,5 км таъмири роҳҳо ва кӯчаю хиёбонҳо ва 20,0 км. роҳҳои автомобилгарди байни биноҳои истиқоматии микроноҳияҳо ва дохилии маҳаллаҳо низ ба нақша гирифта шудааст.
Раиси вилояти Суғд Раҷаббой Аҳмадзода ҳамзамон аз ҷараёни корҳои барқарорсозӣ дар обутобгоҳи соҳили рости дарёи Сир аз наздик шинос шуд.
Иттилоъ дода шуд, ки марҳилаи асосии корҳои ободонӣ дар обутобгоҳ ба анҷом расида, корҳои боқимонда бомаром идома дорад. Роҳбари вилоят ба масъулини дахлдор ҷиҳати андешидани табдирҳои иловагии бехатарии истироҳату оббозии шаҳрвандон дар маҳал, васеъ намудани мавзеъи мазкур, ба талаботи санитарию гигиенӣ ва шаҳрнишинӣ ҷавобгӯ намудани он дастуру супоришҳои қатъӣ дод.
Таъкид шуд, ки обутобгоҳ барои тамоми мардум дастрас ва то оғози мавсим мавриди истифодабарӣ қарор дода шавад.
Манбаъ: Дафтари матбуоти Раиси шаҳри Хуҷанд
Нет комментариев