Боришоти шадиди барф аз санаи бисту шашуми ноябри соли гузашта шурӯъ гардида, алҳол бо таваққуфи кӯтоҳмуддат идома дорад. Бо дарназардошти ҳолати мавҷуда, кормандони филиали ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон ҷиҳати таъмини ҳаракати муназзаму бемонеаи воситаҳои нақлиёт дар ин роҳ тадбир меандешанд. Бо ин мақсад ба таври шабонарӯзӣ навбатдорӣ ташкил шуда, кормандони филиал дар маҳалле, ки боришот нисбатан шадид аст, қарор дошта, роҳро мунтазам бо маводи зиддилағжиш коркард менамоянд. Техникаҳои филиали Ширкат дар ҳолати омодабош қарор дошта, дар хонаҳои устои роҳ барои муваққатан ҷойгир намудани онҳое, ки дар роҳ бинобар иллат пайдо намудани воситаи нақлиёташон дармондаанд, шароит фароҳам оварда шудааст. Ба ғайр аз ин, хати доимоамалкунандаи филиали Ширкат бо шумораи 487011020 фаъол аст, ки тавассути он тамоми муроҷиатҳо қабул ва дар ин замина тадбирандешӣ сурат мегирад. Мутаассифона, бо вуҷуди ба роҳ мондани корҳои фаҳмондадиҳӣ, як идда ронандагон бе омодагӣ (манзур набудани занҷир, аз ҷиҳати техникӣ комил набудани воситаи нақлиёт ва ғайра) ба роҳ мебароянд. Дар натиҷа чунин ронандагон дар роҳ ба мушкилӣ мувоҷҷеҳ гардида, барои ҳаракати дигар воситаҳои нақлиёт монеа эҷод менамоянд. Бояд ёдовар шуд, ки филиали Ширкати саҳомии «Иновейтив Роуд Солюшнз ЛТД» дар Ҷумҳурии Тоҷикистон ҷиҳати таъмини ҳаракати муназзаму бемонеаи воситаҳои нақлиёт дар фасли сармо омодагии ҳамаҷониба гирифтааст ва аз тамоми ронандагон хоҳиш менамояд, ки пеш аз сафар воситаи нақлиёти худро аз муоинаи техникӣ гузаронида, дигар воститаҳои техникиро, ки ҳангоми ҳаракат дар ҳолати боридани барфу борон зарурати истифода онҳо ба миён меояд, бо худ гиранд.
Манбаъ: сомонаи расмии АМИТ «Ховар»
Нет комментариев