Суди вилояти Суғд сокини 39-солаи шаҳри Истаравшан Зариф Болтуевро барои қатли бераҳмонаи корманди шуъбаи ҳифзи тартиботи ҷамъиятии Шуъбаи ВКД дар шаҳри Истаравшан Бахтиёр Нарзуллоеви 35-сола ба 28 соли зиндон маҳкум кард. Бо ҳукми суд ҳамсари корманди милиса, сокини ноҳияи Шаҳристон Дилором Нарзуллоеваи 31-сола низ барои даст доштан ва шарикӣ дар ин ҷиноят ба муҳлати 21 сол аз озодӣ маҳрум карда шуд. Бахтиёр Нарзуллоеви марҳум ва Дилором Нарзуллоева соҳиби ду фарзанд мебошанд. Зимни нишасти хабарии ҷамъбасти 6 моҳи соли равон сардори Раёсати ВКД Тоҷикистон дар вилояти Суғд генерал-майори милиса Шариф Назарзода дар робита ба ба қатли майори милиса дар ноҳияи Шаҳристон иттилоъ дода буд, ки аз рӯи ин далел парвандаи ҷиноӣ боз шуд.
Дар бораи ҷузъиёти ин ҳодиса ӯ чунин гуфта буд: «Субҳи рӯзи 13 июл дар қаламрави ҷамоати Шаҳристони ноҳияи Шаҳристон дар дохили автомашинаи тамғаи «Опел-Астра» ҷасади сӯхтаи корманди шуъбаи ҳифзи тартиботи ҷамъиятии Шуъбаи ВКД дар шаҳри Истаравшан, майори милиса Бахтиёр Нарзуллоеви 35-сола, сокини ҳамин ҷамоат бо аломатҳои марги маҷбурӣ ва осори захму бурида дарёфт шуд».
Назарзода қайд кард, ки марҳум дорои маълумоти олӣ буда, соли 2011 Академияи ВКД-ро хатм кардааст ва аз соли 1997 дар мақомоти корҳои дохилӣ фаъолият дошта, аз моҳи январи соли 2015 ба мансаби ахираш таъин гардида буд ва соҳиби ду фарзанд аст.
Аз ҷониби суд исбот шудааст, ки соли 2013 ҳамсари корманди милиса Дилором Нарзуллоева бо маҳкумшуда ба ишқварзӣ пардохта, муносибатҳои маҳрамонаашон оғоз мегардад. Аз ин алоқаи онҳо шавҳари зан хабардор мешавад. Қотил бо ҳамсари милиса тасмим мегиранд, ки ӯро нобуд месозанд ва шаби 12 июли соли 2015 Зариф Болтуев автомашинаи корманди милисаро манъ намуда, бо корд ба ҷисми ӯ 5 маротиба зарба мезанад. Сипас автомашинаи ӯро ба километри 203-юми шоҳроҳи Душанбе — Чанак бурда, ба он безин мерезад ва ҳамроҳ бо ҷасад дар дохили автомашина оташ мезанад. Дар ин бора news. tj хабар медиҳад.
Нет комментариев