Раёсати БДА-и ВКД дар вилояти Суғд амалиёти “Телефони мобилӣ”-ро анҷом дод.
Бино ба иттилоъи маркази матбуотии ВКД ҶТ, тибқи дастури раҳбарияти Раёсати ВКД дар вилояти Суғд, аз ҷониби шӯъбаи бозрасии давлатии автомобилӣ дар ҳудуди шаҳру ноҳияҳо бо мақсади баланд бардоштани интизоми ҳаракати роҳ ва пешгирӣ кардани ҳодисаҳои нохуш аз 22 ноябр то 2 декабри соли чорӣ амалиёти «Телефони мобилӣ» гузаронида шуд. Ҳадафи дигари ин чорабинӣ таъмини амнияти шаҳрвандон мебошад.
Ин иқдом натиҷаи корҳои иттилоотию таҳлилӣ ва фаъолиятҳои амалӣ мебошад. Мушоҳидаҳои охир нишон медиҳанд, ки ронандагон ва пиёдагардҳо ҳангоми убур аз роҳҳо, бо телефони мобилӣ суҳбат ва онро истифода мебаранд, ки боиси садамаҳои нақлиётӣ мешаванд.
Ташкили суҳбату вохӯриҳо, гузоштани стендҳои иттилоотӣ дар ҷойҳои ҷамъиятӣ, таъсири ҳуқуқӣ ба қонунвайронкуниҳо аз талаботи ин чорабинӣ буд, ки дар сатҳи баланд ташкил ва баргузор гардид.
«Дар давоми 10 рӯзи гузаронидани чорабиниҳои оперативӣ-ҷустуҷӯӣ аз ҷониби кормандони БДА дар шаҳру навоҳии вилояти Суғд 598 далели истифодаи телефони мобилӣ ҳангоми рондани мошин ошкор гардида, нисбати вайронкунандагони қонун тибқи қисми 3 моддаи 310-и Кодекси хукуквайронкунии маъмурии Точикистон мазкур маводи маъмурӣ тартиб дода шудааст. Бояд гуфт, ки барои чунин ҳуқуқвайронкуниҳо ҷарима ба андозаи аз 2 то 3 нишондиҳанда барои ҳисобҳо пешбинӣ шудааст», — қайд мекунад манбаъ.
Аз рӯйи маводи «Sugdnews.com»
Нет комментариев