Бегоҳии рӯзи 8-уми сентябр дар майдони “Авесто”-и маркази вилоят ба муносибати 27-умин солгарди Истиқлолияти давлатии Ҷумҳурии Тоҷикистон бо иштироки роҳбарияти вилояти Суғд, муовини якуми Сарвазири Ҷумҳурии Тоҷикистон, соҳибкорони бурунмарзии вилояти Суғд, ҳайти меҳмонон аз вилояти Самарқанди Ҷумҳурии Ӯзбекистон, фаъолони шаҳру ноҳияҳои вилоят ва кормандони соҳаҳои гуногун чорабинии калони идона доир шуд.
Раиси вилояти Суғд Раҷаббой Аҳмадзода зимни суханронии худ ҳайати меҳмонон аз вилояти Самарқандро ба сарзамини Суғди бостонӣ хайрамақдам гуфта, сокинони вилоятро ба муносибати 27-умин солгарди Истиқлолияти давлатии Ҷумҳурии Тоҷикистон табрик намуд.
Раиси вилоят Раҷаббой Аҳмадзода таъкид кард, ки дар радифи иқдомҳои наҷибонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба таҷлили сазовори 30-солагии Истиқлолияти давлатии Ҷумҳурии Тоҷикистон силсилаи корҳои созандагиву бунёдкорӣ дар саросари Тоҷикистон оғоз ёфта, аз баракоти Истиқлолият Ватани маҳбуб –Тоҷикистони азизи мо боз ҳам шукуфову хуррам мегардад.
-Дар қаламрави вилояти Суғд низ ба шарафи ин ҷашни таърихии миллат тибқи қарори Раиси вилоят 1300 рўзи меҳнати зарбдор ба истиқболи 30-солагии Истиқлолияти давлатии Ҷумҳурии Тоҷикистон эълон гардид ва нақшаи чорбаиниҳо тасдиқ карда шуд. Амалӣ шудани ин иқдом имконият медиҳад, ки дар се соли оянда дар вилоят беш аз 3000 иншооти гуногун бунёд гардида, сатҳи зиндагии мардум баланд ва симои шаҳру ноҳияҳои вилоят тамоман дигаргун шавад, — иброз дошт Раиси вилоят.
Раиси вилоят ҳамзамон изҳори боварӣ намуд, ки таҷлили шукўҳманди ҷашни 27 – солагии Истиқлолияти давлатӣ ба мардуми соҳибмаърифату заҳматкаши вилоят, нерўи тоза бахшида, дар самти таҳкими дастовардҳои он, сулҳу оромӣ, ваҳдати миллӣ ва суботи сиёсӣ дар кишвар, устувории дўстии байни халқу миллатҳо, боз ҳам беҳтар шудани рўзгори халқи азизамон нақши муассир мегузорад.
Муовини якуми Сарвазири Ҷумҳурии Тоҷикистон Давлаталӣ Саид аз номи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сокинони вилоятро бо фарорасии солгарди навбатии Истиқлолияти Ҷумҳурии Тоҷикистон табрик намуда, аз дастовардҳои даврони соҳибистиқлолӣ ёдоварӣ кард. Ӯ аз ҷумла доир ба рушди соҳаҳои маорифу тандурустӣ, фарҳанг, нақлиёту коммуникатсия, сайёҳӣ ва ҳунармандӣ, таъмин гардидани сокинон бо нерӯи барқ ва оби нӯшокӣ маълумот дода, зикр сохт, ки то соли 2021 ва ба истиқболи 30-солагии Истиқлолияти давлатӣ дар мамлакат ҳазорҳо иншооти нав бунёд хоҳад шуд.
Ҳокими вилояти Самарқанди Ҷумҳурии Ӯзбекистон Эркинҷон Турдимов низ аз номи роҳбарият ва мардуми Самарқанд ҷашни Истиқлолиятро барои мардуми тоҷик табрик гуфта, таманниёти неки худро изҳор намуд.
Сипас, аз ҷониби аҳли фарҳанги вилоят барномаи рангини консертӣ намоиш дода шуд ва мушакпаронии идона ба чорабинӣ шукуҳу шаҳомати хоса бахшид.
Манбаъ: Хадамоти матбуоти Раиси вилояти Суғд
Нет комментариев