Кормандони соҳаи тибби ноҳияи Рӯшони Вилояти Мухтори Кӯҳистони Бадахшон ва бемороне, ки ҳоло дар беморхонаи марказии ин ноҳия табобат мегиранд, аз кумакҳои Пешвои миллат бархурдор гардиданд, иттилоъ медиҳад хабарнигори минтақавии АМИТ «Ховар» Файз Мирасан.
Ин кумакҳо, ки аз 35 тонна маводи ғизоӣ, либосҳои махсуси муҳофизатӣ барои табибон ва дорую дармон барои беморон иборатанд, дар ҳузури намояндагони мақомоти иҷроияи ҳокимияти давлатии ноҳия дар анборхона захира шуданд. Баъдан ин кумаки башардӯстона ба беморхонаҳои минтақавии водии Бартанг, марказҳои саломатии ҷамоатҳои деҳоти ин ноҳия интиқол дода мешаванд.
Сардухтури беморхонаи ноҳиявӣ Худоназар Мардонаев барои чунин кумаки саривақтӣ аз номи кормандони соҳаи тиб ва беморони мубтало ба COVID-19 миннатдорӣ баён намуда, изҳор дошт, ки табибон дар айни ҳол шабонарӯзӣ ба муолиҷаи беморон ва пешгирӣ аз паҳншавии ин бемории сироятӣ машғуланд. Дар ин кор ба онҳо мақомоти иҷрои ҳокимияти давлатии ноҳия, соҳибкорону шахсони саховатпеша низ кумак мерасонанд. Ба гуфтаи сардухтури беморхона, «аз рӯзи эълон шудани пандемия дар мамлакат дар беморхона 15 нафар бистарӣ шуданд, ки то имрӯз 8 нафарашон табобат ёфта, ба хонаҳояшон баргаштанд. Вазъи беморони дигар низ хуб аст ва умедворем, ки рӯзҳои наздик пурра шифо хоҳанд ёфт».
Ба андешаи мудири шуъбаи рушди иҷтимоӣ ва робита бо ҷомеаи мақомоти иҷроияи ҳокимияти давлатии ноҳия Зубайда Султонбекова, «агар хоҳем, ки аз ин бемории сироятии марговар наҷот ёбем, бояд дар атрофи давлати соҳибистилолу ҳукумати ҷумҳуриамон муттаҳид бошем. Танҳо ҳамин муттаҳидию ҳамбастагӣ моро наҷот медиҳад».
Собиқадори соҳаи маориф Гулбегим Шакарбекова изҳор намуд, ки «мо кумаку дастгириии Сарвари давлат Эмомалӣ Раҳмонро дар давраҳои ҳасосу вазнин ҳамеша эҳсос менамоем. Вақте ки сокинони деҳаи Ғудараи водии Бартанг бар асари зилзила ва сокинони деҳаи Барсеми ноҳияи Шуғнон дар натиҷаи сели даҳшатбор манзилу тамоми дороиҳои худро аз даст доданд, нахустин шуда, Сарвари давлат ба онҳо дасти кумак дароз кард, ҳамаи осебдидагонро дар зудтарин фурсат ҳам бо манзил ва ҳам асбобу лавозимоти зарурии рӯзгор таъмин намуданд».
Миллати тоҷик дар давраҳои гуногуни таърихӣ борҳо бо мушкилиҳо рӯ ба рӯ шудаву ҳар бор бо муттаҳидию ҷонфидоии COVID-19 низ як имтиҳони навбатӣ барои мардуми ҷаҳон ва аз ҷумла, тоҷикистониён аст, ки ин бор ҳам бо иродаи матин ва дили пур аз умед пушти сар хоҳанд кард.
Манбаъ: АМИТ «Ховар»
Нет комментариев