Маҳсулот
Гӯшти гусфанд – 1 кг (2-3 бурда гушти лаҳм ҳамроҳи қабрғаҳо. Гӯшти гӯсфандро мешавад ба гӯшти гов ё тайлоқ иваз кард)
Думбаи гӯсфанд – 300-350 г(равғани растани низ мешавад)
Биринҷи навъи «дев-зира» – 1 кг
Сабзии сурх – 1 кг
Пиёзи куни – 2-3 дона
Сирпиёз – 2-3 дона,
Қаламфур – 1-3 дона (хоҳ сурх бошад, хоҳ сабз фарқ надорад)
Зира
Намак
Аввал сабзии сурхи расидаро реза мекунем. Корди хубу тезва тахтачаро гирифта сабзиро ба таври амудӣ қимма мекунем. Сабзиро бо турбтарошак ва дигар таҷҳизоти барқӣ қимма карда оши палав пухта намешавад.
Гӯштро 1,5 сантиметрӣ чоркунҷа пора мекунем.
Биринҷро гирифта бо об то он вақте, ки аз он оби соф ҷорӣ шавад, мешӯем. Баъдан биринҷро дар оби ширгарм (на оби ҷӯшомада) тар мекунем.
Дегро хуб метасфонем. Думбаҳои чоркунҷа қиммакардаро ба дег андохта доғ мекунем. То он лаҳзае, ки ҷазза ранги тилломонанд ба худ касб кунад. Баъдан ҷаззаҳоро бо кафгир аз дег мегирем. Агар Шумо палавро бо равғани растанӣ тайёр кардани бошед, онро то дуди ғализ баровардан доғ мекунем. Як дона пиёзи куниро яклухт ба равғани тасон меандоз ва то сиёҳ шудани қабати болоии пиёз онро мезирбонем. Ин амал тамъи равғанро хуб мекунад.
Ба равғани доғкардашуда гўшти лаҳмро меандозем. Эҳтиёт кунед, ки равғани доғкардашуда метавонад пош хӯрда ба шумо осеб расонад. Ду маротиба гўштро бо кафгир тоб медиҳем ва то зардча шудани он мезирбонем. Баъдан гӯштро аз дег ба табақчаи алоҳида гирифта ба як сў мегузорем.
Интизор мешавем то ин ки равған тасфад ва пиёзро ҳалқа-ҳалқа реза карда ба дег меандозем. То бухор шудани оби пиёз онро мезирбонем ва гўштро дубора ба дег меандозем ва ҳамроҳи пиёз мекобем. Оташро паст намекунем!
Сабзии резашударо ба дег меандозему 2-3 дақиқа мезирбонем. Баъдан онро бо гўшту пиёз омезиш медиҳем. Сабзиро эҳтиёткорона бояд кофт то ин ки бисёр қимма нашавад. Боз 10-15 дақиқа бирён карда баъдан оташро каме паст мекунему каме зира мепошем.
Оби ҷӯшомадаро ба дег мерезем то даме, ки об аз сабзӣ 1,5 сантиметр болотар шавад. Баъдан сирпиёзро шуста решачаҳояшро тоза мекунем ва яклухт ҳамроҳи қаламфур ба дег меандозем.
Баъди он ки об меҷўшад, оташро боз каме паст мекунем ва 40 дақиқаи дигар меҷўшонем. Даҳони дег бояд кушода бошад ва зирбак бояд ранги сурхи хокистаранг ба худ касб кунад. Оташро дубора сахт баланд мекунем ва ба зирбак то каме аз меъёр шӯр шудан намак мепошем.
Оби биринҷро пурра мерезем ва онро оҳиста бо кафгир ба дег меандозем. Биринҷ бояд баробар дар дег паҳн карда шавад. Баъдан тақрибан 1 литр оби ҷўшомадаро ба дег тавре мерезем, ки қабати биринҷ вайрон нашавад. Миқдори об аз навъи биринҷ вобаста аст. Баъзе навъҳои биринҷ оббардор ва баъзеашон бараксанд.
Беҳтараш обро камтар резед, чунки об илова кардан осон аст. Аз ҳама асосӣ қабати об бояд биринҷро пурра пӯшонад. Оташро то ҳадди имкон баланд мекунем, то ин ки об тезтар ҷўшад. Сарпӯши дегро метавон то ҷўшидани об маҳкам кард. Бояд об то дараҷае ҷўшад, равған боло барояд ва бадан бо кам шудани об ҷо-ҷо аз миёни биринҷ бухор шуда биринҷҳоро ба ҷунбиш дарорад. Танҳо дар ҳамин ҳолат палав хуб мешавад.
Ба ҳеҷ ваҷҳ биринҷро бо кафгир кофтан мумкин нест, танҳо сатҳи биринҷро дар сурати бо паси кафгир ҳамвор кардан мумкин аст. Баъдан чанд дона биринҷро бо кафгир гирифта зери дандон кунед. Биринҷ бояд ғафс шуда ҳангоми хоидан овоз набарорад. Дар дег бояд об намонад, ҳамааш бухор шавад.
Акнун ба болои биринҷ боз каме зира пошед ва бо зарфи оҳанӣ ва ё сафоли даҳони дегро маҳкам кунед.
20-25 дақиқа интизор шавед. Баъдан даҳони дегро боз карда буридаҳои гўшт, сирпиёз ва қаламфурро дар табақи алоҳида мегирем. Пас палавро омехта мекунем.
Палавро дар табақи гирди калон мебардорем ва болояшро бо гўшт, қаламфур ва сирпиёз оро медиҳему рўи миз мегузорем. Иштиҳои том!
Нет комментариев