"ТеплЭко" дар ярмаркаи байналмилалии савдо "Суғд-2017"

Имрӯз, 16-уми июни соли 2017 дар маркази вилояти Суғд — шаҳри Хуҷанд Ярмаркаи байналмилалии савдо «Суғд-2017» оғоз ёфт ва он пагоҳ низ идома меёбад.

Дар ярмарка, ки таҳти шиори «Суғд: водии имкониятҳо» сурат мегирад, истеҳсолкунандагони маҳсулот ва корхонаву муассисаҳои коркарди маҳсулоти кишоварзӣ, намояндагони коргоҳҳои азими соҳаҳои мухталифи саноатӣ аз саросари Тоҷикистон, ширкатҳо, бонкҳо, сохтмон, нақлиёт, доираҳои соҳибкории Федератсияи Русия, давлатҳои Ӯзбекистон, Қирғизистон, Қазоқистон, Белорус, Хитой, Ҷопон, Ҳиндустон, Малайзия, Полша, Сербия ва дигар мамолики хориҷӣ, намояндагони созмонҳои байналмилалӣ ва васоити ахбори омма ширкат варзида истодаанд.

Ҷараёни баргузории ярмаркаи байналмилалиро дар қатори намояндагони васоити ахбори оммаи дохилӣ журналистони хориҷӣ низ дар расонаҳои гуногун инъикос намуда истодаанд. Бахусус, гурӯҳи журналистон аз Федератсияи Россия, Ҷумҳурии Қазоқистон ва Ҷумҳурии Беларус дар вилояти Суғди Ҷумҳурии Тоҷикистон қарор доранд. Намояндагони воситаҳои ахбори оммаи хориҷӣ доир ба имкониятҳои содиротии Ҷумҳурии Тоҷикистон ва рушди соҳаҳои гуногуни хоҷагии халқи мамлакат гузоришҳо омода менамоянд.

Дар радифи намояндагони ВАО-и дохил ва хориҷи кишвар, Дастаи Медиапортали «Тироз» низ дар Ярмаркаи байналмилалии савдо «Суғд-2017» иштирок ва бароятон аз рафти кори ярмарка гузорише омода ва пешниҳоди Шумо-хонандагони азиз мекунад.

Дар ҳақиқат, даҳҳо корхонаҳои коркарди маҳсулоти кишоварзӣ, намояндагони коргоҳҳои азими саноатӣ на танҳо аз минтақаҳои мухталифи Тоҷикистон, балки аз ҷумҳуриҳои дӯсту бародар фаъолона иштирок ва маҳсулоти истеҳсолнамудаи худро ба намоиш гузоштанд.

Сокинон ва меҳмонони шаҳри Хуҷанд аз павилйони ҳар як корхонаву ширкат дидан намуда, маҳсулот ва лавозимоти хушсифату беҳтаринро барои манзил ва корхонаҳои худ дархост ва харидорӣ намуданд.

Яке аз корхонаҳои азими саноатие, ки ба истеҳсоли маҳсулоти зарурӣ нигаронида шудааст, Ширкати маъруфи «ТеплЭко» мебошад.

Маҳсулоти ба Ярмаркаи байналмилалии савдо «Суғд-2017» пешниҳодкардаи ширкат гармкунакҳои каммасрафи муосир мебошанд, ки хона ва ҷойи кори Шуморо дар фасли зимистон ба таври мунтазам гарм мекунанд. Муҳим аз ҳама бо нерӯи ками барқ.