Имрӯз 1-март оғози баҳор, фасли эҳёшавии табиат.
Бо қадами хуҷастаи баҳор ҳама ҷо ҳусну таровати дигар мегирад. Замину замон қабои сабзро ба бармекунад. Табиат аз нав зинда мегардаду ба дилҳо шодиву фараҳ мебахшад, дар баробари табиат инсонҳо низ зебову барно мегарданд. Борони давобахши баҳорӣ, ки дамодам мешорад, гарму нарм аз синаҳои абри найсон бар тани афсурдаи хок қатра-қатра ҷон мебахшад. Заминро сабзу гулафшон мегардонад. Ҳоло ба кӯча бароед вазидани насими форам, буйи баҳорро ба машом меораду дар қалбхои мо меҳру муҳаббатро бедор месозад.
Баҳор, боз омадӣ?
Биё!
Марҳабо!
Биё ман ошиқи туям, ту нозанини ман ҳастӣ!
22 сол муқаддам дар ин фасли зебо санаи 1-уми марти соли 2001-ум аввалин радиои мустақили FM дар ҷумхурӣ дар мавҷи 103,7 расман ба фаъолият оғоз намуд.Бояд гуфт, ки таъсиси радио маҳсули саъю талош ва заҳматҳои муассиси радио, марди наҷиб, Хуршед Улмасов аст. У як зумра журналистон ва эҷодкорони соҳибистеъдодро муттаҳид сохта, як радиои бонуфузро таъсис дод, ки ҳоло беш аз 2 млн нафар шунаванда дорад. Радиои Тироз расман шабакаи мусиқавию иттилооти буда, фаъолияти асосии он ба таври фаври расонидани ахбороти навин аз ҳаёти иқтисодиву иҷтимоӣ ва маданиву сиёсии кишвар маҳсуб меёбад. Барномаҳое, ки аҳли эҷодӣ ва техникии радиои Тироз омодаи пахш месозанд, хусусияти ахбориву фароғатӣ ва мусиқавию-фарҳангӣ доранд. Барномаҳои пурмазмуну пурмухтавояш бо назардошти анъанахои милли тахия мегардад. Қисми асосии барномахои Радиои Тироз услубу равиши хоси худро дорад. Барномаҳои иттилоотиву фарҳангиаш бахри баланд бардоштани маънавиёти мардум мусоидат мекунад. Гуфтан чоиз аст, ки радио нақши тарбияви дораду талқингари маърифату маънавият мебошад. Имрӯзҳо 22 — сол аст, ки садои он дар фазои кошонаи шумо, шунавандагони азиз, танинандоз аст.
Ба ифтихори 22-солагӣ бошад, аҳли эҷод дар радиои “Тироз” бо барномаҳои наву рангин бо пахши мустақим ва барномаҳову мусиқиҳои идонаро аз субҳ, соати 6:00 то 24:00 тақдими шунавандагон мегардонанд.
Ба муносибати таъсисёбии «Радиои Тироз» тамоми ҳамқаламон ва алоқамандони мавчи «Тироз»-ро самимона табрику фархундабод гуем!
Нет комментариев