То фарорасии Иди соли нави 2017 ҳамагӣ як рӯз боқӣ монд. Ҳамдиёронамон бошанд, ҳоло дар ташвиши хушу хотирмон гузаронидани ин ид буда, кӯшиш мекунанд, ки дар рӯйи дастархони солинавӣ беҳтарину лазизтарин шириниву хуришҳоро гузоранд.

Мусаллам аст, ки соли ҷорӣ бӯҳрони иқтисодӣ ба буҷети кишвари мо низ таъсир расонд ва шаҳрвандони мо аз ин бохабаранд.

Тавре дар урфият мегӯянд «Ба кӯрпаат нигоҳ куну пой дароз намо!», аз ин рӯ, мо соҳибхоназанҳо кӯшиш мекунем, ки Иди соли навро сарфакорона гузаронида, ба буҷаи оилаамон таъсири манфӣ нарасонем.

Дастархони солинавиро асосан торт зебу зиннат медиҳад, аз ин лиҳоз, бароятон чанд маслиҳати худро оид ба камхарҷ омода намудани торти идона пешниҳод мекунем. Умед мебандем, ки маслиҳати мазкур бароятон муфид мегардад.

 Маслиҳати аввал. Торти шоколадӣ аз қуймоқ (блинчик)

Маҳсулоти зарурӣ:

Барои қуймоқ: 4 дона тухм,  1,5 стакон шир, 1 стакон об, 2 стакон орд, 1/2 стакон хокаи какао, 6 қошуқ равғани маска, 2 қошуқ шакар, 2 қошуқча ҷавҳари ванил.

Барои шоколад:  қаймоқи латдодашуда, мусси шоколадӣ (Nutella) ё боз ягон маҳсулоти дигар мувофиқи табъ.

Тарзи омода намудани торт:

Тамоми компонентҳоро дар блендер омехта карда, 10 сония лат диҳед. Баъдан хамири тайёршударо барои як соат дар яхдон гузоред. Тафдонро тафсонида, бо равғани маска пазед.

Қуймоқро ба рӯйи табақча ниҳода, ба қабатҳояш хамираи шоколадиро бо қаймоқи латдодашуда молед.

Торти мо тайёр шуд, иштиҳои том!

Маслиҳати дуюм. Торти сникерс

Маҳсулоти зарурӣ барои бисквит:
6 дона тухм, 3,5 стакан шакар, 1 қошуқи ошӣ майонез, 1 стакан ҷурғот, 1 қошуқча моддаи ковоккунанда, 250 гр маргарини мулоим,  3 стакан орд.

Крем: 250 гр равғани маска,  ширқиёми пухта 1 қуттӣ

Тарзи тайёр кардани хамир:

1. 6 зардии тухмро бо 1,5 стакан шакар, 250 гр маргарини мулоим, 1 қошуқи ошӣ майонез, 1 қошуқи моддаи ковоккунанда ва 3 стакан ордро омехта карда, хамир омода мекунем.

Тарзи тайёр кардани безе:

1. 6 сафедии тухмро 5 дақиқа бо миксер лат мезанем, 2 стакан шакарро оҳиста-оҳиста ҳамроҳ мекунем ва то тайёр шуданаш, яъне, то сахтак шуданаш лат мезанем.

Тарзи тайёр кардани крем:

1. 250 гр равғани маскаро бо 1 қутти ширқиёми пухта омехта мекунем.

Тарзи тайёр кардани бисквит:

1 . Хамири шуридаамонро ба 3 қисм ҷудо карда, ба муддати ним соат ба яхдон мегузорем.

2. Ба лаълии тафдон равған молида, 1 қисми хамирамонро гирифта, ба болои лаълии тафдон тунук мекунем.
3. Аз болои хамир безеи тайёр кардаамонро мемолем ва ба тафдон дар дараҷаи паст (тақрибан 120 дараҷа) мегузорем.
4. Ҳамин тавр 2 коржи дигарамонро низ пухта мегирем.
5. Коржи якумамонро ба болои лаълӣ гузошта, нисфи кремро мемолем ва каме чормағз мепошем.
6. Аз болояш коржи дуюмро гузошта, боқимонда кремамонро мемолем ва чормағз мепошем.
7. Коржи сеюмамонро мегузорем, болои коржи сеюм, яъне, коржи охиронамонро бо глазуру чормағз оро медиҳем.
8. Як шаб мегузорем, то ки кремро ба худ ҷаббида гирад.

Торти мо омода шуд, иштиҳои том!

 Маслиҳати сеюм.  Пироги осону арзону болаззат

Маҳсулоти зарурӣ: Мураббо (кадом намуде ки бошад) 1 стакон, сода 1 қошуқи чойӣ, кефир (ҷурғот) 1 стакон, шакар 1 стакон, тухм 2 дона, орд 2 — 2,5 стакан.

Тарзи тайёр кардан:

Мурабборо (аз ман мураббои аз нок тайёркардашуда буд) гирифта, бо сода ҳамроҳ мекунем ва мегузорем то 2-3 дақиқа дам занад. Баъди дам заданаш ба он кефир, тухм, шакар ва ордро ҳамроҳ мекунем, ҳамаи маҳсулотҳоро хуб омехта менамоем. Хамири тайёршударо ба қолаби равғанмолида мерезем. Ба тафдони 180 дараҷа гармшуда дар муддати 45-60 дақиқа мегузорем.

Ин буд, чанд маслиҳати мо оид ба омода намудани торти идона, таманно мекунем, ки мисли ин тортҳо зиндагиатон ширину гуворо бошад!